Հայաստանի մէջ ծնած, բայց Առաջին համաշխարհային պատերազմի տարիներուն գանատական Պրանթֆորտ քաղաքին մէջ բնակող Սամ Չիքեճեան այդ քաղաքէն պատերազմի մեկնած ամենաերիտասարդ բնակիչը եղած է, որ պայքարած ու զոհուած է: Տեղական «Brantford Expositor» պարբերականը յօդուած նուիրած է  երիտասարդ զինուորին:

Թերթին համաձայն, Չիքեճեան վճռական եղած է  կամաւոր զինուորագրուելու եւ Եւրոպա` մարտադաշտ մեկնելու հարցին մէջ: «Այն, ինչ ես կը յիշեմ, երբ ան դպրոց կ’երթար, սքոթլանտացի  քանի մը երեխաներու հետ մեկնեցաւ Թորոնթօ, որպէսզի միանայ սքոթլանտական գունդին: Բայց մայրը գնաց Թորոնթօ եւ ետ վերադարձուց անոր»,- պատմած է Սամի զարմիկը` 98-ամեայ Էնտի Չիչակեան Համիլթընէն:

Բայց որքան ալ մայրը` Լուսիկը, փորձած է ընտանիքի ամենակրտսեր երեխային ետ պահել պատերազմէն, Սամը կայացուցած էր իր որոշումը: Ան զինուորագրուած է եւ ուղեւորուած ովկիանոսէն այն կողմ: Միանգամայն հնարաւոր է, որ ան ծնած էր 1899 թուականին, սակայն աւելի հաւանական է, որ 1903 կամ 1904 թուականի ծնունդ  եղած է: Ամէն պարագայի, Սամ Չիքեճեան 1918 թուականի Փետրուարին եղած է Անգլիոյ մէջ, զինուորական պատրաստութիւն անցած` ճակատ մեկնելու համար: Գրեթէ եօթ ամիս անց ան զոհուած է եւ յուղարկաւորուած Ֆրանսայի Սեն-լը-Մարկեօն բնակավայրի «Օնթարիօ» գերեզմանատան մէջ:

Տեղացի պատմաբան Ճեֆրի Մոյերին շատոնց յայտնի է շարքային Սամ Չիքեճեանի պատմութիւնը: «Ան Պրանթֆորտէն ամենաերիտասարդն էր, որ պայքարած ու զոհուած է Առաջին համաշխարհային պատերազմի ժամանակ»,- նշած է պատմաբանը: