Պուէնոս Այրէսի Հայկական վարժարաններու մէջ  ուսանող երեք հարիւրէն աւելի աշակերտներ  նոյեմբեր 6-ին  մասնակցեցան «Յիշումի  եւ Պահանջքի Օրուան» միջոցառման, որուն ընթացքին անոնք  ցանեցին Անմոռուկ ծաղիկի (որ ընտրուեցաւ իբրեւ խորհրդանիշ Հայկական Ցեղասպանութեան Հարիւրամեակին) հունտեր:  Այս մասին կը տեղեկացնեն ՀՀ սփիւռքի նախարարութեան Ամերիկայի հայ համայնքներու վարչութենէն:

 Այս ձեւով մեր գաղութին մէջ բացումը  կատարուեցաւ Հայկական Ցեղասպանութեան հարիւրամեակին նուիրուած ոգեկոչման ձեռնարկներու շարքին:

Մեծ խանդավառութեամբ  եւ գիտակցութեամբ անոնք երեք ժամ աշխատեցան Հայ Կեդրոնի Սիրանուշ սրահին մէջ: Ներկայ  էին Հայաստանի Հանրապետութեան դեսպան՝ պարոն Վահագն Մելիքեան, Գիսակ Արք.Մուրատեան՝ Առաջնորդ Արժանթինի եւ Չիլէի, հայկական դպրոցներու տնօրէններ, ինչպէս նաեւ տարբեր կազմակերպութեանց ներկայացուցիչներ:

Սերմերը ցանուեցան 5000  փոքրիկ թաղարներու մէջ, որոնք ձրիաբար պիտի բաշխուին Նոյեմբեր 29ին՝ Պարրանքաս տէ Պելկրանօ թաղամասին մէջ տեղի ունենալիք «Պուէնոս Այրէս կը տօնէ Հայաստանի Օրը»  բացօթեայ ժողովրդական հանդիսութեան ընթացքին:

Այս ձեռնարկը եւս կը մտնէ 100ամեակին նուիրուած գործունէութեանց ծիրին  մէջ: