Ամենապատիւ եւ գերերջանիկ

 Ներսէս Պետրոս ԺԹ. Կաթողիկոս Պատրիարք

 Տանն Կիլիկիոյ Կաթողիկէ Հայոց

Ամենապատիւ եւ գերերջանիկ Տէր,

Շնորհակալութիւն կը յայտնեմ Ձեզի՝ Հայաստան-Սփիւռք 5-րդ համաժողովի աշխատանքներուն Ձեր մասնակցութիւնը եւ օրհնութեան խօսքը բերելու համար:

Ամենապատի՛ւ Տէր, յատկապէս բարձր գնահատանքի արժանի է Ձեր գլխաւորութեամբ եւ անմիջական ջանքերով ու մասնակցութեամբ՝ Հայոց ցեղասպանութեան 100-րդ տարելիցին նուիրուած այն ահռելի եւ չափազանց պատասխանատու աշխատանքները, որ Հայ Կաթողիկէ Եկեղեցին յաջողութեամբ կը կատարէ Վատիկանի մէջ, մասնաւորապէս՝ միջազգային էկումենիկ կապերու նախադէպը  չունեցող 2015 թ, ապրիլ 12-ին Սուրբ Պետրոս տաճարին մէջ Վատիկանի Կուրիոյ կարտինալներու, բարձրագոյն հոգեւոր դասի եւ Վատիկանի մէջ հաւատարմագրուած օտարերկրեայ դիւանագիտական ներկայացուցչութիւններու մասնակցութեամբ հայածէս Սուրբ Պատարագի մատուցումը Ֆրանսիսկոս Ա. Սրբազան Քահանայապետի կողմէն:

Ոգեւորիչ եւ ընդօրինակելի է Ձեր ստեղծագործ տքնաջան գործունէութիւնը, որ Սփիւռքի հայ կաթողիկէ համայնքներու կը հաղորդէ հոգեւոր նոր լիցքեր:

Աւելորդ չեմ համարեր կարեւորելու Հայ Կաթողիկէ Եկեղեցւոյ Հայաստանի, Վրաստանի, Ռուսիոյ եւ Արեւելեան Եւրոպայի թեմի առաջնորդ Սրբազան հօր տիտանական աշխատանքը, որ անգնահատելի է կաթողիկէ եւ առաքելական համայնքներու մերձեցման, Հայաստանի մէջ հաստատուած սուրիահայերու աջակցութեան, Հայաստան-Սփիւռք կապերու ամրապնդման գործին մէջ:

Թո՛ղ Հայրենիքի եւ աշխարհափիւռ հայորդիներու միաբանման վեհ գործին իր նպաստը բերէ Հայաստան-սփիւռք 5-րդ համահայկական համաժողովի հռչակած սկզբունքները, որոնց կեանքի կոչելը ըլլան նաեւ համատեղ գործողութիւններու իւրօրինակ ծրագիր «սփիւռքի նախարարութեան եւ Հայ Կաթողիկէ Եկեղեցւոյ միջեւ:

Ձեզի կը մաղթեմ առողջութիւն, ոգիի արիութիւն եւ համատեղ գործակցութեան նորագոյն հորիզոններ:

ԽՈՐԻՆ ՅԱՐԳԱՆՔՈՎ՝

ՀՐԱՆՈՅՇ ՅԱԿՈԲԵԱՆ