ԱՄՆ-ի Քոնկրէսի պլոկ The Hill-ը` քաղաքականութեան ոլորտի մասնագէտներու հարթակը, հրապարակած է ԱՄՆ-ի մէջ ԼՂՀ-ի գրասենեակի խորհրդական Արամ Աւետիսեանի պատասխանը ատրպէյճանցի լրագրող Նասիմի Աղաեւի խմբագրականին, որ, հեղինակին խօսքով, նպատակ ունէր  ընթերցողներուն շեղելու, կը գրէ tert.am-ը:

Աւետիսեան կը նշէ, որ Արցախի անկախութիւնն ու ինքնորոշումը սատարող Քալիֆորնիոյ իշխանութիւններու ընդունած բանաձեւը ցոյց կու տայ, որ ԱՄՆ-ի այդ նահանգին մէջ Արցախը զգալի աջակցութիւն ունի` ի հեճուկս Իլհամ Ալիեւի վարչակարգին, որ տարիներ ու միլիոններ  կը ծախսէ ի շահ վարչակարգի գործերը ընելու համար:

Հեղինակը կը նշէ, որ Աղաեւը պատճառ ունի նեղուելու Քալիֆորնիոյ մէջ  իր երկրի «Խաւիարային դիւանագիտութեան» ապագայէն:

Կը նկատուի, որ խորհրդային Ատրպէյճանի հալածանքներէն ազատելու համար Արցախի ժողովուրդը խաղաղ, ժողովրդավարական միջոցներու  դիմած է: Պատերազմը եղած է Ատրպէյճանի ընտրութիւնը: Ինչ որ իր հերթին ապագաղութականացման տրամաբանութիւնը  ըմբռնելու Ատրպէյճանի իշխանութիւններու անկարողութեան հետեւանքն է:

«Այսօր նպատակը ապագայ ողբերգութիւնները կանխելն է, սակայն ցաւալի է, որ այդ նպատակը չի կիսեր Ալիեւի վարչակարգը:  Ասիկա կը դրսեւորուի ոչ միայն հայերու հասցէին ատելութիւն պարունակող հռետորաբանութեամբ, այլեւ խաղաղութիւն ցանկացող ատրպէյճանցիներու դէմ հալածանքներով»,- կը նշէ ան:

Անդրադառնալով Աղաեւի տարբեր պնդումներուն` հեղինակը հետեւեալ հակափաստարկները կը  բերէ: Արդէն 20 տարի է, որ Ատրպէյճանը չի կատարեր ՄԱԿ-ի Անվտանգութեան խորհուրդի բանաձեւերը, Ատրպէյճանը չի կատարեր ԱՄՆ-ի եւ միջազգային հանրութեան պահանջը` ետ կանչելով իր դիպուկահարները շփման գիծէն:

Իսկ Ատրպէյճանի իշխանութիւններու փորձը` Ղարաբաղի խնդիրը ներկայացնել իբրեւ տարածքային վէճ Հայաստանի ու Ատրպէյճանի միջեւ, կը հակասէ 1994-ի հրադադարին, որ ստորագրած են Հայաստանը, Ատրպէյճանը եւ Լեռնային Ղարաբաղը, որ պարզորոշ ցոյց կու տայ եռակողմ ձեւաչափ:

Ըստ հեղինակին` բանակցութիւնները արդիւնք չեն տար, քանի որ Ատրպէյճանը կը հրաժարի վերադառնալու նախքան 1998-ը գործած ձեւաչափին, երբ մասնակից կողմ էր նաեւ ԼՂՀ-ը:

Հեղինակը կը նկատէ նաեւ, թէ որքան անհեթեթ է Աղաեւի կողմէ իր երկիրը իբրեւ «յետխորհրդային յաջողութեան տիպար» ներկայացնելու փորձը: Ատիկա բնորոշիչ եւ ծիծաղելի է Ալիեւի վարչակարգի հռետորաբանութեան համար, երբ կաշառակեր վարչակարգը կը վայելէ նաւթի ապահոված բարիքները եւ սեփական քաղաքացիներուն կը պատժէ Facebook-ի վրայ մեկնաբանութիւններ ընելու համար,  հարիւրի մօտ քաղբանտարկեալ պահելով, կը ճնշէ մարդու իրաւունքներու պաշտպաններուն եւ ՀԿ-ներուն` չնայած միջազգային հանրութեան, ԱՄՆ-ի նախագահի քննադատութեան: Աւետիսեան կը յիշեցնէ նաեւ այս հանգամանքներով Ատրպէյճանին սպառնացող պատժամիջոցներուն մասին: Եւ  կը նկատէ, թէ հազիւ ասիկա կարելի է յաջողութեան օրինակ համարել, որուն արժէ հետեւիլ:

Աւետիսեան շնորհակալութիւն կը յայտնէ Քալիֆորնիային նշուած իրողութիւններն ըմբռնելու համար, իսկ ԱՄՆ-ի Քոնկրէսին` Արցախին ընդլայնուած աջակցութիւն ցուցաբերելու համար: