ՀՀ ԱԳ նախարար Էդուարդ Նալպանտեան Times.am–ի հետ զրոյցին անդրադառնալով Փարիզի մէջ երէկ տեղի ուենցած հանդիպման, ըսած է, որ ինքը այն կը բնորոշէր իբրեւ կառուցողական, օգտակար եւ անկեղծ:

«Մենք շնորհակալ ենք Ֆրանսիայի Հանրապետութեան Նախագահ Ֆրանսուա Օլանտին Լեռնային Ղարաբաղի հիմնախնդրի կարգաւորման վերաբերեալ Փարիզում հանդիպում կազմակերպելու նախագահների մակարդակով: Վերջին երեք ամսուայ ընթացքում սա արդէն երրորդ հանդիպումն է նախագահների` Լեռնային Ղարաբաղի հարցի կարգաւորման վերաբերեալ, եւ դա ցոյց է տալիս, որ եռանախագահող երկրները հաստատակամ են շարունակելու իրենց միասնական ակտիւ ջանքերը` ուղղուած հիմնախնդրի կարգաւորմանը: Այդ կոնտեքստում էր նաեւ այսօրուայ հանդիպումը Փարիզում»: Այս մասին, ինչպէս կը տեղեկացնէ Times.am-ը, գիշերը յայտարարած է ՀՀ արտաքին գործոց նախարար Էդուարդ Նալպանտեան:

«Մենք բարձր ենք գնահատում բոլոր այն նախաձեռնութիւնները, որոնք ուղղուած են հանդիպումների կազմակերպմանը յատկապէս ամենաբարձր մակարդակով, որոնք հնարաւորութիւն են տալիս կողմերին աւելի լաւ ծանօթանալու մօտեցումներին իրար եւ հնարաւորութիւն է փնտրելու մօտեցնել դիրքորոշումները», – ըսած է նախարարը, կը գրէ Artsakhpress-ը:

«Այսօրուայ հանդիպումը ես կը բնորոշէի որպէս կոնստրուկտիւ, կառուցողական, օգտակար եւ անկեղծ: Այս հանդիպման ընթացքում քննարկուեցին բազմաթիւ հարցեր, որոնք վերաբերւում են Լեռնային Ղարաբաղի հիմնախնդրի կարգաւորմանը եւ նաեւ վստահութեան ամրապնդման միջոցառումներ, որոնք առաջարկուել էին դեռ Ֆրանսուա Օլանտի կողմից իր այցելութեան ժամանակ տարածաշրջան` Մայիս ամսին եւ որոնք ողջունուել էին նաեւ եռանախագահների կողմից: Մեր մօտեցումները նոյնն են ինչ որ եռանախագահների մօտեցումներն են: Այդ կարգի վստահութեան միջոցառումները կարող են լաւ պայմաններ ստեղծել առաջընթաց արձանագրելու համար բանակցային գործընթացում: Ատրպէյճանի մօտեցումը մի փոքր այլ է: Իրենք այլ ծայրից են, այսպէս ասած, մօտենում, որովհետեւ կարծում են, որ առաջընթացը բանակցութիւնների կարող է պայմաններ ստեղծել վստահութեան ամրապնդման միջոցառումների համար: Բնականաբար, դա մի փոքր տարբեր մօտեցում է, բայց դա յայտնի մօտեցում է, ինչը որ եղել է նաեւ նախկինում:

Այսօր հանդիպման ընթացքում նաեւ հնարաւորութիւն եղաւ նախագահների, քննարկելու նաեւ այլ հարցեր, որոնք վերաբերւում են տարածաշրջանային , միջազգային խնդիրներին, որոնք բաւական հետաքրքիր քննարկումներ էին, որոնք ցոյց տուեցին, որ կան հարցեր, որոնց նկատմամբ Հայաստանի եւ Ատրպէյճանի մօտեցումները կարող են նաեւ մօտ լինել», – շեշտած է ԱԳ նախարար Էդուարդ Նալպանտեան: