Արժանթինի    մէջ    հայ    համայնքն    արդէն    ձեւաւորած   է   համայնքային յանձնաժողով,    որուն որոշմամբ եւ նախաձեռնութեամբ ալ  տեղի պիտի ունենան Հայոց ցեղասպանութեան հարիւրերորդ տարելիցի   ձեռնարկները: Տեղի պիտի ունենան քաղաքական, կրօնական, մշակութային եւ ակադեմական ուղղուածութեամբ   ձեռնարկներ:

«Արմէնփրէս»-ի հետ   զրոյցին    ընթացքին   Պուէնոս   Այրէսի   Սան  Անտրեսի    համալսարանի    միջազգային յարաբերութիւններու       փրոֆէսոր   Խաչիկ   Տէր– Ղուկասեան     կը   շեշտէ,     որ    ձեռնարկներու    նպատակն է   քարոզչական   լայն   արշաւ   նախաձեռնել    ամբողջ  տարուան  ընթացքին   հարցին   հանրային   հնչեղութիւն տալու  համար` հաշուի  առնելով  այն հանգամանքը, որ 2015թ. Արժանթինի մէջ պիտի կայանայ նախագահական  ընտրութիւն:

«Համայնքային կազմակերպութիւնները, կեդրոնական ձեռնարկներէն բացի,  ձեռնարկներ   պիտի կազմակերպեն երկրի այլ հայաշատ քաղաքներուն մէջ: Արժանթինի հայ համայնքը կեդրոնական    յանձնաժողովին առաջարկած է     ձեռնարկներուն       մէջ   ներառել   Ծիծեռնակաբերդի   յուշահամալիրին   նախագահներ  Ռաուլ Ալֆոնսինի եւ Նեսթոր Քիրչների անունով      յուշատախտակներ     զետեղելը`      իբրեւ    շնորհակալութիւն  առաջինին`   1987թ. Ցեղասպանութիւնը        հրապարակային     կերպով     ճանչնալուն,     իսկ       երկրորդին`      2006թ    Արժանթինի խորհրդարանի      ներկայացուցած      ցեղասպանութեան  ճանաչման     օրէնքն ընդունելու    համար:   Առաջարկն ընդունուած  է,         հետեւաբար        մենք   ջանք    պիտի    թափենք    եւ    մեր նպատակն   է,   որ           Արժանթինի պատուիրակութիւնը մասնակցի 100-րդ տարելիցի պաշտօնական   նախաձեռնութիւններուն»,- ըսաւ Խաչիկ Տէր-Ղուկասեան:

Արժանթինի  հայ     համայնքը   ուշադիր   պիտի   ըլլայ   նաեւ     Թուրքիոյ     եւ     Ատրպէյճանի   իրականացուցած ժխտողականութեան փորձերուն եւ պիտի   փորձէ հակազդել   անոնց:  Խաչիկ   Տէր   Ղուկասեանի   փոխանցմամբ արժանթինցի հասարակութիւնը   ծանօթ   է   Հայոց   ցեղասպանութեան,   կը   դատապարտէ   եւ   կանգնած է   հայ ժողովուրդի       կողքը:         Հէնց   ատիկա  է    պատճառը,   որ   վերջին  շրջանին   խիստ  աշխուժացած   է    թուրք-ատրպէյճանական  քարոզչութիւնը:      «Պաքուի դիւանագիտական ներկայացուցչութիւնը լուրջ եւ հետեւողական աշխատանք   կը   կատարէ   Խօջալուն  իբրեւ   «Ցեղասպանութիւն»   ճանչնալու     ուղղութեամբ:      Այս      հարցի առնչութեամբ Ատրպէյճանը աշխուժ քարոզչութիւն կը  ծաւալէ   հասարակական     եւ   քաղաքական   ծիրին   մէջ: Հետեւաբար, թէ իբրեւ համայնք, թէ իբրեւ պետութիւն պէտք է անընդհատ աշխատինք, այլապէս անոնց դրամն  ու աշխատանքային ներդրումը կրնան լուրջ հարուած հասցնել Հայոց ցեղասպանութեան    միջազգային   ճանաչման հարցով մեր կատարած ջանքերուն»,- ըսաւ Խաչիկ Տէր- Ղուկասեան:

Անոր խօսքով, Հայոց ցեղասպանութեան 100-րդ տարելիցի լաւագոյն ձեռնարկներէն մէկը պիտի ըլլայ   Պուէնոս Այրէսի մէջ Հայոց ցեղասպանութեան թանգարանի գործարկումը:   Դեռեւս  յստակ չէ,   թէ   շինարարութիւնը    երբ կ’աւարտէ, սակայն նպատակն է, որ ոչ միայն կառոյցը պատրաստ ըլլայ 2015թ,   այլեւ   կազմակերպուի    առաջին ցուցադրութիւնը:

Անդրադառնալով   ՀՀ  նախագահ  Սերժ  Սարգսեանին  Թուրքիոյ   նախագահ  Ռեճէպ Թայիպ Էրտողանին 2015թ. Ապրիլ   24-ին   Երեւան   հրաւիրելու   նախաձեռնութեան,   Խաչիկ Տէր   Ղուկասեան   այն    գնահատեց   յանդուգն մարտահրաւէր     եւ     խելացի       պատասխան   Ապրիլին Էրտողանի արտայայտած  «ցաւակցութեանը», ինչ որ, փաստօրէն,   Ցեղասպանութեան   «մեղմ»    ժխտողականութեան   նորագոյն   մարտավարութիւնն   է`    ուղղուած  յատկապէս միջազգային հանրային կարծիքին: