Սեպտեմբեր 1-ի Երեւանեան գեղեցիկ առաւօտուն, դպրոցական տարեշրջանի «Առաջին Զանգ»-ին հետ, Խորեն եւ Շուշանիկ Աւետիսեան դպրոցը իր նորակառոյց շէնքին դռները բացաւ, ողջունելու խառն յուզումով եւ ուրախութեամբ լեցուն ուսուցիչներու, աշակերտներու, ծնողներու եւ բարեկամներու հոծ բազմութիւն մը։

ԿԱՌՈՒՑՈՒԱԾ ԱՊԱԳԱՅԻ ՀԱՄԱՐ

Աւետիսեան եւ Պիլեզիքեան ընտանիքներու սիրալիր եւ առատաձեռն նուիրատուութեամբ, ինչպէս նաեւ Ամերիկայի Հայ Աւետարանչական Ընկերակցութեան (ԱՀԱԸ) շատ մը ուրիշ նուիրատուներու առատաձեռն նուէրներով, ԱՀԱԸ-ը կրցաւ կառուցանել նոր եւ բարձրորակ դպրոցական համալիր մը, իր մէջ պարփակելու Մանկապարտէզէն մինչեւ տասնըերկրորդ կարգի աշակերտներ։ Նորակառոյց այս շէնքը կը հանդիսանայ Հայաստանի եւ այդ շրջանի երկիրներու առաջին «Կանաչ» Դպրոցը, ստանալով «Էներկետիկ եւ Բնապահ­պա­նա­կան Նախագիծի մեջ Առաջնու­թիւն» (Leadership in Energy and Environ­mental Design, LEED  միջազգային հաւաստագիրը: Ասոր հետ մէկտեղ, համագործակցութեամբ Հայաստանի Ծառի Ծրագրին (Armenia Tree Project), դպրոցաշէնքը պիտի ունենայ երդիքի կանաչ պարտէզներ “green roof gardens”, որ ոչ միայն պիտի օգնէ շէնքի ջերուցման կամ զովացման ծախսերու խնայողութեան, այլ նաեւ պիտի հանդիսանայ ինքնուրոյն կրթական կերպար մը։

Տնտեսապէս աղքատ՝ Երեւանի Մալաթիա-Սեբաստիա քաղաքամասի երեխաներուն առաջին մակարդակի ուսում ջամբելու կողքին, դպրոցաշէնքը պիտի ծառայէ նաեւ որպէս համայնքային կեդրոն, ուր տարբեր քաղաքային խումբեր պիտի կարենան իրենց հանդիպումները ունենալ եւ մարզական խումբեր իրենց փորձերը եւ մարզական խաղերը կատարել։ Դպրոցաշէնքը պիտի գործածուի նաեւ արտադպրոցական շատ մը տարբեր ծրագիրներու, ինչպէս՝ չափահասներ մարզելու տարբեր աշխատանքի հմտութիւններու։ Ժամանակի ընթացքին նաեւ կարելիութիւն պիտի ընծայուի համալսարաններու, ամառուան ընթացքին կարգ մը դասեր դասաւանդելու յառաջադէմ աշակերտներու։

ԿՈՉ՝ ՄԻԱՆԱԼՈՒ ԱՅՍ ՎՍԵՄ ԳՈՐԾԻՆ

Աւետիսեան ընտանիքը այս ծրագրին համար ԱՀԱԸ-ին նուիրած է հինգ միլիոն տոլար։ Կոչ կ’ուղղենք մեր բոլոր հայրենակիցներուն օգնելու ԱՀԱԸ-ին, որպէսզի ան կարենայ հասնիլ Աւետիսեան ընտանիքի նուիրատուութեան համապատասխանող իր խոստումին՝ ամբողջացնելու այս վսեմ աշխատանքը։

Ամերիկայի Հայ Աւետարանչական Ընկերակցութիւն