Օգոստոս 29-ին Արամ Խաչատրեանի անուան մեծ համերգասրահին մէջ` ՀՀ սփիւռքի նախարարութեան, ՀՀ մշակոյթի նախարարութեան աջակցութեամբ եւ ՀԲԸՄ  հովանաւորութեամբ կայացաւ «Երգում է 70-ականներու Երեւանը եւ Հալէպը» խորագիրով բարեգործական համերգը, որմէ ստացուած ողջ հասոյթը կ’ուղղուի սուրիահայերու կարիքներու ապահովման:

Համերգը վարեցին հանրաճանաչ հաղորդավար Սուսաննա Շահինեանը եւ սուրիահայ երգիչ Ժան Վարդանը:

70-ականներու երգերու կատարումներով հանդէս եկան Արամոն, Էմմին, Գայեանէ Յովհաննիսեանը, Ռադիկ Գաբրիէլեանը:

Ճազային երաժշութեան ընտրանի ներկայացուցին սուրիահայ արուեստագէտներ Րենա Տին, Ժան Վարդանը, Լիլա Վարդանեան-Պօղոսեանը, Կարօ Տաղտեւիրենեանը:

Կը նուագակցէր «70-ականներու Երեւան» նուագախումբը, որու երաժիշտներու հիմնական մասը Կոնստանտին Օրբէլեանի` Հայաստանի պետական էսդրատային  նուագախումբի անդամներն են:

Համերգին ներկայ էին ՀՀ սփիւռքի նախարար Հրանոյշ Յակոբեան, պաշտօնատար անձիք, մտաւորականներ, արուեստի գործիչներ, հիւրեր:

Ողջունելով համերգի կազմակերպիչները, նախարար Հրանոյշ Յակոբեան մասնաւորապէս նշեց. «Ուզում եմ շնորհակալութիւն յայտնել այս հրաշալի նախաձեռնութեան կազմակերպիչներին, հովանաւորներին, արտիստներին: Այսօր Հալէպը արիւնահոսում է, մեր մայր գաղութը պատերազմի մէջ է: Մենք հաւաքուել ենք այստեղ մեր զօրակցութիւնը յայտնելու, օգնելու, աջակցելու մեր սիրիահայ  հայրենակիցներին: Նրանք զգում են, որ Հայրենիքն իրենց կողքին է եւ դժուարին պահին մենակ չի թողել: Մենք ուժեղ ենք միասին, եւ միասին պէտք է յաղթենք ու զօրանանք: Մենք կանք, կը լինենք ու կը շատանանք»:

Հայաստանցի եւ սուրիահայ սիրուած երգիչներու մասնակցութեամբ համերգը Հայաստանի մէջ սուրիահայերու ընդելուզման հերթական քայլն է եւ ապացոյցը, որ մշակոյթը ազգի համախմբան կարեւորագոյն միջոցներէն է:

Համերգը աւարտեց «Զարթի՛ր լաօ» երգի միասնական կատարումով: Երաժիշտներուն ոտնկայս կը ձայնակցէր ողջ դահլիճը: