Օգոստոս 2-ին «Իմ Հայաստան» համահայկական փառատօնի խմբերգային արուեստի օրերու մասնակից երգչախումբերը Հայաստանի երաժշտական ընկերութեան դահլիճին մէջ հանդիպում ունեցան Հայաստանի երգչախմբային արուեստի մեծերուն հետ` մայեսթրօ Յովհաննէս Չէքիճեանի գլխաւորութեամբ:

Հայաստանի երաժշտական ընկերութեան նախագահ, փրոֆ. Դաւիթ Ղազարեան ողջունեց ՀՀ սփիւռքի նախարարութեան նախաձեռնութիւնը` «Իմ Հայաստան» համահայկական փառատօնը կազմակերպելու եւ փառատօնի ծիրէն ներս Սփիւռքի մէջ գործող երաժշտական խումբերու այցը Հայրենիք կազմակերպելու  համար:

Հայաստանի երաժշտական ընկերութեան նախագահը շնորհաւորեց Սփիւռքէն ժամանած երգչախումբերը օգոստոս 1-ին` Խմբերգային արուեստի օրերու բացման ունեցած փայլուն ելոյթին համար եւ ուրախութիւն յայտնեց, որ համերգը նուիրուած էր ՀՀ եւ ԽՍՀՄ ժողովրդական արուեստագէտ, ՀՀ արուեստի վաստակաւոր գործիչ մայեսթրօ  Յովհաննէս Չէքիճեանի 85-ամեայ յոբելեանին:

Դաւիթ Ղազարեան ներկայացուց մայեսթրոյի կեանքն ու գործունէութիւնը:

Այնուհետեւ ելոյթ ունեցաւ Յովհաննէս Չէքիճեան: Աշխարհահռչակ խմբավարը Սփիւռքէն ժամանած երաժիշտներուն պատմեց իր կեանքին մէջ ունեցած դժուարութիւններուն մասին եւ խորհուրդ տուաւ երբեք չերկնչիլ խոչընդոտներուն:

Ձեռնարկին ներկայ էին եւ մասնակիցներուն ողջունեցին նաեւ Երեւանի պետական երաժշտանոցի փրոֆէսորներ Աթանէս Առաքէլեան եւ Իվան Վարդանեան:

Իրենց կոմիտասեան կատարումներով մասնակիցներուն ողջունեցին Երեւանի Ա. Տէր-Ղեւոնդեանի անուան երաժշտական դպրոցի «Գայեանէ» երգչախումբը` գեղարուեստական ղեկավար Մ.Անդրէասեանի եւ նորաստեղծ Երիտասարդական երգչախումբը` գեղարուեստական ղեկավար Էմմա Առաքէլեանի խմբավարութեամբ:

Հանդիպման աւարտին փառատօնի մասնակիցներուն նուիրեցին «Հայ երգահաններու խմբերգներու ընտրանի» եւ Կոմիտասի մանկական խմբերգներու ժողովածուները: