Յուլիսի 11-ին Մայր Աթոռ Ս. Էջմիածնի Գեւորգեան հոգեւոր ճեմարանի հանդիսութիւնների դահլիճում նախագահութեամբ Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսի տեղի ունեցաւ Գեւորգեան հոգեւոր ճեմարանի 2013-2014 թթ. ուսումնական տարուայ փակման հանդիսաւոր արարողութիւնը:

Հանդիսութեանը ներկայ էին Մայր Աթոռի միաբանները, Մայր Աթոռ Ս. Էջմիածնի բարերար Հայկ Դիդիզեանը, Մայր Աթոռի հոգեւոր-կրթական հաստատութիւնների տեսչական ու ուսուցչական անձնակազմը եւ Գեւորգեան հոգեւոր ճեմարանի սաները:

 Տէրունական եւ Գեւորգեան հոգեւոր ճեմարանի օրհներգից յետոյ 2013-2014 թթ. ուսումնական տարին ամփոփեց Մայր Աթոռի հոգեւոր-կրթական հաստատութիւնների վերատեսուչ, Գեւորգեան ճեմարանի տեսուչ Տ. Գեւորգ եպիսկոպոս Սարոյեանը` փաստելով այն կարեւոր ձեռքբերումները, որոնք արձանագրուել են Մայր Աթոռի հոգեւոր-կրթական հաստատութիւններում: Գեւորգ Սրբազանը մեծ նուաճում համարեց յատկապէս այն, որ ուսումնառութեանը զուգընթաց տարբեր հանրաճանաչ մասնագէտների կողմից Գեւորգեան ճեմարանում անցկացուել են բազում արտաժամեայ դասախօսութիւններ, կազմակերպուել ճանաչողական եւ մշակութային բնոյթի այցելութիւններ: Իր խօսքում Գեւորգ եպիսկոպոսն անդրադարձաւ ներճեմարանական նորակազմ տարբեր խմբակների գործունէութեանը, եկեղեցական սոցիալական ծրագրերին ճեմարանականների մասնակցութեանը, սաների ջանքերով «Սերմնացան» մատենաշարի շրջանակներում հրատարկուող աշխատութիւններին: Ճեմարանի տեսուչը ներկայացրեց նաեւ Հայաստանի եւ արտերկրի տարբեր բարձրագոյն կրթական եւ հոգեւոր հաստատութիւնների եւ Ճեմարանի միջեւ ձեւաւորուած արդիւնաւէտ համագործակցութիւնը:

Այնուհետեւ հայրենասիրական բնոյթի բանաստեղծութիւններով ու երգերով հանդէս եկան Գեւորգեան հոգեւոր ճեմարանի սաներն ու երգչախումբը` ղեկավարութեամբ ՀՀ արուեստի վաստակաւոր գործիչ Ռուբեն Ասատրեանի:

Ճեմարանի ուսումնական տարուայ փակման ցերեկոյթն ամփոփուեց Ամենայն Հայոց Կաթողիկոսի օրհնութեամբ եւ պատգամով: Նորին Սրբութիւնն իր ուրախութիւնը յայտնեց անցնող տարուայ ընթացքում Մայր Աթոռի հոգեւոր կրթական հաստատութիւններում արձանագրուած յաջողութիւնների եւ դրական տեղաշարժերի առիթով` իր գնահատանքը բերելով ճեմարանի տեսչութեանը եւ դասախօսական կազմին ներդրած ջանքերի եւ կատարած աշխատանքների համար: Հայոց Հովուապետը վերահաստատեց, որ Հոգեւոր ճեմարանի գործունէութիւնը պէտք է նպատակաուղղուած լինի արժանաւոր հոգեւորականներ դաստիարակելուն, գիտելիքների հետ մէկտեղ սաների անձերի մէջ կամք եւ տեսիլք կրթելուն, որպէսզի, մուտք գործելով եկեղեցական ասպարէզ, պատրաստ լինեն շարունակելու առաքելաշաւիղ հայրերի նուիրեալ ու լուսաւոր առաքելութիւնը եւ փառքի նոր էջեր յաւելեն Հայոց Եկեղեցու պատմութեան մէջ:

Խօսքն ուղղելով Ճեմարանի այս տարուայ 32 շրջանաւարտներին եւ քահանայից լսարանն աւարտած 10 սաներին` Նորին Սրբութիւնը պատգամեց. «Իւրաքանչիւրը պիտի լաւագոյնս իմանայ Եկեղեցին շէնացնելու եւ պայածառացնելու իր ուրոյն կերպը` իրականացնելու Տիրոջ փրկչագործական առաքելութիւնը մեր ժողովրդի կեանքում, զօրացնելու նրա հոգեւոր կեանքը եւ փրկութեան առաջնորդելու: Իսկ փրկութեան ճանապարհը դժուարին ճանապարհ է` սատանայական փորձութիւններով լեցուն: Այդ ամէնը կ’իրականացնենք, եթէ մենք ունենք տեսիլք եւ այդ տեսիլքն իրագործելու կամք: Այլապէս տուեալ անձը, ով դուրս է գալիս ճեմարանի հաստատութիւնից, չպիտի կարողանայ բարի արդիւնքներ արձանագրել ո՛չ իր անձի, եւ ո՛չ էլ մեր Սուրբ Եկեղեցու համար: Ճեմարանական նստարանին իւրաքանչիւր ուսանող պէտք է կերտի իր երազը, իր տեսիլքը ապագայ գործունէութեան` որպէս հոգեւոր սպասաւոր: Այդպէս է, որ մեր Եկեղեցին կը հզօրանայ, մեր Եկեղեցու առաքելութիւնն արդիւնաւոր կը լինի, եւ կը պայծառանայ, կը շողայ Հայաստանեայց Առաքելական Սուրբ Եկեղեցու փառքը ազգային մեր կեանքում»:

Ուսումնառութիւնը շարունակող ճեմարանականներին Ամենայն Հայոց Հայրապետը յորդորեց, հաւատարիմ Ճեմարանի օրհներգի պատգամին, լինել մեծ տեսիլքի զաւակներ, ազգային արժէքների պահապաններ ու քաջ զինուորներ եւ, հոգեւոր հաստատութեան յարկի ներքոյ կրթական տարիները լաւագոյնս օգտագործելով, զինուել  գիտելիքներով, զօրանալ երազով ու տեսիլքով եւ իբրեւ արժանաւոր զաւակներ ազգի եւ արժանաւոր սպասաւորներ մեր Սուրբ Եկեղեցու արդարացնել մեր ժողովրդի բոլոր յոյսերն ու ակնկալութիւնները:

Հանդիսութիւնը փակուեց «Պահպանիչ» աղօթքով եւ Հայրապետական մաղթերգով: