Յունիսի 23-ին Մայր Աթոռ Սուրբ Էջմիածնում նախագահութեամբ Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսի տեղի ունեցաւ Գերագոյն հոգեւոր խորհրդի ժողով:

Ժողովի սկզբում ԳՀԽ անդամներին իր օրհնութիւնը բերեց Ամենայն Հայոց Հայրապետը` ողջունելով նաեւ Երուսաղէմի Հայոց Պատրիարք Ամենապատիւ Տ. Նուրհան արքեպիսկոպոս Մանուկեանի ներկայութիւնը ԳՀԽ ժողովին: Նորին Սրբութիւնն ընդգծեց, որ ժողովը գումարուել է նկատի ունենալով Երուսաղէմի Հայոց Պատրիարքի Մայր Աթոռում գտնուելու պարագան` քննարկելու Հայոց Ցեղասպանութեան 100-ամեայ տարելիցին ընդառաջ հրատապ լուծում պահանջող հարցեր, ինչպէս նաեւ Հայ Եկեղեցու թեմերի եւ կառոյցների գործունէութեանը վերաբերող խնդիրներ: Ապա Վեհափառ Հայրապետը հրաւիրեց Երուսաղէմի  Հայոց Պատրիարքին ատենապետելու ժողովը:

Ժողովի ընթացքում Հայոց Ցեղասպանութեան նահատակների սրբադասման եւ  Միւռոնօրհնութեան արարողութեան նախապատրաստական աշխատանքների ընթացքի մասին զեկոյցներ ներկայացրեցին Մայր Աթոռի դիւանապետ Տ. Արշակ եպիսկոպոս Խաչատրեանը եւ Մայր Աթոռի Եկեղեցական հայեցակարգային հարցերի գրասենեակի տնօրէն Տ. Բագրատ եպիսկոպոս Գալստանեանը: Լսելով ներկայացուած զեկոյցները` Գերագոյն հոգեւոր խորհուրդը գնահատանք յայտնեց Սրբադասման ու Միւռոնօրհնութեան յանձնախմբերին եւ Եկեղեցական հայեցակարգային հարցերի գրասենեակին կատարուած աշխատանքի համար:

Ժողովին որոշուեց առաջիկայ Միւռոնօրհնութեան արարողութիւնն անցկացնել 2015 թ. սեպտեմբերի 27-ին` Ս. Վարագայ խաչի տօնին: Այս կապակցութեամբ Ամենայն Հայոց Հայրապետի կողմից յանձնարարական տրուեց յանձնախմբերին ձեռնամուխ լինելու միջոցառումների պատշաճ կազմակերպմանը:

Վիրահայոց թեմին վերաբերող խնդիրների վերաբերեալ զեկուցեց թեմի առաջնորդ Տ. Վազգէն եպիսկոպոս Միրզախանեանը: Անդրադառնալով թեմական կեանքին` ժողովականներն իրենց գնահատանքը յայտնեցին Վազգէն Սրբազանին եւ թեմի եկեղեցականներին Վրաստանում Հայ Եկեղեցու եւ հայ համայնքի իրաւունքների պաշտպանութեանը եւ հոգեւոր կեանքի զօրացմանն ուղղուած իրենց նուիրեալ ջանքերի համար:

Մայր Աթոռ Սուրբ Էջմիածնի հոգեւոր-կրթական հաստատութիւնների գործունէութեան վերաբերեալ զեկուցեց հոգեւոր-կրթական հաստատութիւնների վերատեսուչ, Գեւորգեան հոգեւոր ճեմարանի տեսուչ Տ. Գեւորգ եպիսկոպոս Սարոյեանը` մասնաւորապէս անդրադառնալով եկեղեցականների պատրաստութեան, ինչպէս նաեւ սաների հաւաքագրման եւ ընդունելութեան գործընթացին: Ընդգծելով աշխարհասփիւռ հայութեան հոգեւոր կարիքները հոգալու համար բաւարար թուով եկեղեցականների պատրաստութեան հրամայականը` Գերագոյն հոգեւոր խորհուրդը որոշեց Գեւորգեան հոգեւոր ճեմարանում հաստատել հոգեւոր-կրթական հաստատութիւնների դիմորդների հաւաքագրման յատուկ գրասենեակ: Այս առնչութեամբ հոգեւոր-կրթական հաստատութիւնների վերատեսչին յանձնարարուեց պատրաստել տեղեկագրեր հոգեւոր-կրթական հաստատութիւնների մասին, նաեւ թելադրուեց, Նուիրապետական Աթոռների հոգեւոր-կրթական հաստատութիւնների պատասխանատուների հետ համախորհուրդ, մշակել թեմերում եւ համայնքներում ճեմարանների կարեւոր առաքելութեան եւ գործունէութեան իրազեկմանն ուղղուած մի ծրագիր, որը հրաւէր կ’ուղղի երիտասարդութեանն ուսումնառութիւնը շարունակելու հոգեւոր-կրթական հաստատութիւններում եւ յետագայ ծառայութիւնը բերելու Հայ Եկեղեցու անդաստանում: