Ուրբաթ, յունիսի 13-ին, Հ. Մ. «Արարատ» կազմակերպութեան 70-ամեակի յանձնախմբի նախաձեռնութեամբ եւ Կրթական խորհրդի հետ նախապէս կատարւած համադրութեամբ, «Սասուն» եւ «Ահարոնեան» մանկապարտէզների եւ «Շանթ» ու «Գիւլբենգեան» դպրոցների հայ ուսուցչական, տեսչական եւ ծնողական խորհուրդների կազմերից 20 հոգի, յանձնախմբի ուղեկցութեամբ, շրջեցին «Արարատ» մարզաւանում եւ ծանօթացան Հ. Մ. «Արարատ» կազմակերպութեան կառոյցի, տարբեր միութիւնների ու բաժինների աշխատանքների դժւարութիւններին ու մտահոգութիւններին:

Ընդհանրապէս, «Արարատ» մարզաւանը, իրանահայութեան եւ յատկապէս թեհրանահայութեան համար «երկրորդ տուն» է համարւում: Օրական հազարաւոր հայեր, յատկապէս ամռան սեզոնին անարգել, տարբեր առիթներով ելումուտ են անում մարզաւան եւ օգտւում առկայ հնարաւորութիւններից, սակայն քչերը գիտեն, թէ այդ բոլոր հնարաւորութիւնները ինչպէս են ստեղծւել եւ պահպանւում:

Այս այցելութիւնները կազմակերպելով, յանձնախումբը նպատակ ունի, հաճելի ժամանցի կողքին, մեր հասարակութեան տարբեր խաւերի ներկայացուցիչներին մարզաւան հրաւիրելով՝ մօտկից եւ ուղղակի շփումով, իրազեկել կատարւող աշխատանքների, ապագայ ծրագրերի, առկայ դժւարութիւնների եւ խոչընդոտների մասին:
Այս ծրագիրը շարունակելի է եւ առաջին փուլում ընդգրկելու է բոլոր հայոց դպրոցները:

Հ. Մ. «Արարատ» Կ.