Իսրայէլի մէջ Ռէուէն Ռիւլինի նախագահ ընտրուելու առիթով տեղի հայ համայնքի ներկայացուցիչներն ու յատկապէս ՀՅԴ Երուսաղէմի Հայ դատի յանձնախումբի անդամները ստացած են բազմաթիւ շնորհաւորանքներ: Պառճառն այն է, որ Ռիւլինը կը համարուի իսրայէլահայերու բարեկամն ու ամենատարբեր ամպիոններէ բազմիցս կոչ ըրած է, որ ցեղասպանութիւն տեսած հրեաները ճանչնան Հայոց ցեղասպանութիւնը: «Արմէնփրէս»-ի հետ զրոյցին ՀՅԴ Երուսաղէմի Հայ դատի ներկայացուցիչ Ժորժետա Աւագեան նշած է, որ համայնքի եւ յատկապէս Հայ դատի գրասենեակի հետ բարեկամութիւնը  աւելի քան մէկ տասնամեակ կեանք ունի:

«Հայ համայնքէն ներս բոլորը երջանիկ են, որ Ռիւլինը ընտրուած է նախագահ: Ան աչքի կ’իյնայ հումանիստական, քաղաքակրթական արժէքներով: Ան քանի մը անգամ Քնէսէթի մէջ ելոյթի ժամանակ ըսած է` ամօթ է, որ ցեղասպանութիւն ապրած հրեայ ժողովուրդը չի ճանչնայ 20-րդ դարու առաջին ցեղասպանութիւնը:

Այժմ մենք լիայոյս ենք, որ Իսրայէլի մէջ Հայոց ցեղասպանութեան միջազգային ճանաչման նոր փուլ պիտի մեկնարկէ, որ կ’աւարտէ պատմական արդարութեան հանդէպ յաղթանակով: Եւ պատճառն այստեղ ոչ թէ այն է, որ Ռէուէն Ռիւլինը հայամէտ է, ոչ, ան քաղաքակիրթ, հումանիստ եւ մարդկային բարձր արժէքներ կրող անձնաւորութիւն»,-ըսած է  Ժորժետա Աւագեան:

Ան  շեշտած է, որ հրեայ ժողովուրդը նոյնպէս երջանիկ է եւ շատ գոհ, որ 7 տարի Ռիւլինը պիտի գլխաւորէ իրենց երկիրը:

Ժորժետա Աւագեան նշած է, որ Հայ դատի ներկայացուցիչները մտադիր են հանդիպիլ Ռէուէն Ռիւլինին: «Մեզի համար շատ անսովոր է, որ պէտք է նամակ գրենք Ռիւլինին` շնորհաւորենք եւ հանդիպման համար պայմանաւորուինք:

Սակայն, կարգն է այդպէս: Մեր ընկերը ըլլալուն զուգահեռ ան նաեւ նախագահ է եւ պէտք է պահպանել պաշտօնական արարողակարգը: Հանդիպման ժամանակ ալ կը պայմանաւորուինք յետագայ ընելիքներու եւ ծրագիրներու մասին»,- ըսած է  Ժորժետա Աւագեան` աւելցնելով, որ վստահ են, որ հիասթափութիւն չեն ապրիր եւ Իսրայէլի նորանշանակ նախագահը կը պահէ խոստումը:

Ժորժետա Աւագեան յոյս յայտնած է, որ 2015թ. ապրիլ 24-ին Ռէուէն Ռիւլինը
Հայաստանի նախագահի հրաւէրով պիտի գայ Հայաստան եւ  մասնակցի Ծիծեռնակաբերդի յուշահամալիրին մէջ իրականացուիելիք ոգեկոչման արարողութեան: Ան նաեւ յոյս յայտնած է, որ նոր նախագահի նշանակմամբ Հայաստան-Իսրայէլ յարաբերութիւնները կ’ըլլան աւելի բարձր մակարդակի վրայ: Յունիս 11-ին Իսրայէլի Քնեսէթը երկրի նախագահ  ընտրած է խորհրդարանի նախկին խօսնակ, հինգ թեկնածուներէն աջ ճամբարի միակ ներկայացուցիչ Ռէուէն Ռիւլինը, որ պիտի փոխարինէ Խաղաղութեան Նոբելեան մրցանակի դափնեկիր Շիմոն Պերեսին:

Ընտրութիւններու երկրորդ փուլին «Լիկուդ» իշխող կուսակցութիւնը ներկայացնող 74-ամեայ Ռիւլինին աջակցած են ներկայ գտնուող 119 խորհրդարանականներէն  63-ը: Պետութեան ղեկավարը կ’ընտրուի խորհրդարանի գաղտնի քուէարկութեամբ: Յաղթելու համար նախագահի թեկնածուին կը պահանջուի ապահովել 120 խորհրդարանականներէն 61-ի աջակցութիւնը: Իսրայէլի մէջ, որ խորհրդարանական հանրապետութիւն Է, պետութեան ղեկավարը օժտուած Է հիմնականին մէջ ներկայացուցչական գործառոյթներով: Իրական իշխանութիւնը կեդրոնացած Է վարչապետի ձեռքին մէջ:

Յասմիկ Յարութիւնեան

armenpress.am