Լոս Անճելըս գաւառի քարտուղարի գրասենեակի Չորեքշաբթի, Յունիս 4ի տուեալներուն համաձայն՝ Կլենտէյլի քաղաքապետական խորհուրդի թափուր աթոռը յառաջիկայ 10 ամիսներուն լեցնելու նպատակով Յունիս 3ին կատարուած արտակարգ ընտրութիւններէն յաղթական դուրս եկած է հանգստեան կոչուած կրթական մշակ Փօլա Տիվայնը՝ խլելով քուէներուն 33.67 տոկոսը (5111 քուէ):

Կլենտէյլի Հայ Դատի յանձնախումբին աջակցութիւնը վայելող Վարդան Կարապետեանը երկրորդ հանդիսացած է՝ ապահովելով քուէներուն 22 տոկոսը (3338 քուէ), իսկ Ռիք Պառնզ՝ երրորդ (20.7 տոկոս, 3141 քուէ): Նաեւ, Շահէ Քերօղլեան ստացած է 2074 քուէ (13.67 տոկոս), իսկ Մայք Մոհիլ՝ 1508 քուէ (9.94 տոկոս):

Վերջնական տուեալները պիտի հրատարակուին Յունիս 30ին: Եթէ տուեալները հաստատուին, ապա Տիվայն քաղաքապետական խորհուրդի անդամ պիտի մնայ մինչեւ Ապրիլ 2015:

Նշենք նաեւ, որ Քալիֆորնիոյ նահանգապետի ընտրութիւններուն ամենամեծ թիւով քուէներ ապահոված են դեմոկրատ կառավարիչ Ճերի Պրաունը եւ հանրապետական թեկնածու Նիլ Քաշքարին, որոնք իրարու դէմ պիտի մրցին Նոյեմբերի ընտրութեանց ընթացքին: Պրաուն ապահոված է քուէներուն 59.97 տոկոսը, իսկ Քաշքարի՝ 18.16 տոկոսը:

http://asbarez.com