Ապրիլ 13-ին Հայ Առաքելական Սուրբ Եկեղեցին կը տօնէ Ծաղկազարդը, որ տարիներ առաջ Ն. Ս. Օ. Տ. Տ. Գարեգին Բ Ամենայն հայոց կաթողիկոսը հռչակած է որպէս Մանուկներու օրհնութեան օր: Տօնական օրը Նոր Նախիջանի եւ Ռուսաստանի Հայոց թեմի Մոսկուայի նորակառոյց Սուրբ Պայծառակերպութիւն եկեղեցին լեցուն էր հաւատացեալներով: Իրենց զաւակներուն Թեմակալ առաջնորդ Տէր Եզրաս արքեպիսկոպոս Ներսիսեանի օրհնութիւնը ստանալու համար եկեղեցի  բերած էին հարիւրաւոր հայ ծնողներ.  բացառութիւն չէին նաեւ Թեմի հովանիի ներքոյ գործող Մոսկուայի «Հայորդաց տան» սաները:

Չնայած այս տարի Ծաղկազարդը նոյն օրը կը նշէր նաեւ ռուս ուղղափառ եկեղեցին, սակայն մոսկուաբնակ հայերն առանց երկմտութեան ընտրած էին Սուրբ Պայծառակերպութիւնը: «Հայորդաց տան» սաները Սբ. Պատարագէն ետք  ստացան Սրբազանի օրհնութիւնը, լուսանկարուեցան թեմակալ առաջնորդի եւ Սբ. Պատարագին մասնակցած ԼՂՀ նախագահի հետ:

Կրթօճախի սաներէն Ռիմա եւ Արինա Հայթեաններու մայրը` Արմինէ Մարտիրոսեանը, եւս փոքրիկներուն հետ եկեղեցւոյ մէջ էր: Մեզի հետ զրոյցին ան ըսաւ. «ինչպէս Մոսկուայում բնակուող միւս հայ ծնողները, այնպէս էլ ես, չէի կարող բաց թողնել այս գեղեցիկ տօնին մասնակցելու եւ զաւակներիս Սրբազան Հօր օրհնութեանը ներկայացնելու հնարաւորութիւնը: Պարզապէս անասելի երջանկութիւն է, որ այս տարի մենք արդէն իսկ հնարաւորութիւն ունենք մեր տօները դիմաւորել նորակառոյց Սբ. Պայծառակերպութիւն եկեղեցում, որի տարածքում գտնուելիս անգամ մի պահ մոռանում ենք, որ հեռու ենք մեր հայրենիքից»:

Հաւատացեալները եւ մանուկները եկեղեցիէն հեռացան` լեցուած Սբ. Պատարագէն ստացած լոյսով ու հանգստութեամբ, իսկ երգչախումբն իր հետ տարաւ նաեւ ներկաներու գոհունակութիւնը: Յատկանշական է, որ այս գեղեցիկ տօնին Սբ. Պատարագին երգելու պատիւը ընձեռուած էր «Հայորդաց տան» երգչախումբին, որ կը ղեկավարէ Լենա Բեգլարեանը:

Արմինէ Կարեյեան, Մոսկուա