Ապրիլ 12-ին Վիրահայոց թեմի «Հայարտուն» կեդրոնի Գալուստ Կիւլպէնկեան սրահին մէջ բացուեցաւ Հայոց մեծ եղեռնի 99-րդ տարելիցին նուիրուած «Յուշարձան եղեռնի  նահատակներուն» խորագիրով  ցուցահանդէսը: Այն կազմակերպած էր Վրաստանի հայ նկարիչներու միութիւնը  Վիրահայոց թեմի «Հայարտուն» կեդրոնի աջակցութեամբ: Ցուցահանդէսին ներկայ էին Վրաստանի խորհրդարանի անդամ Ռուսլան Պօղոսեան, Թիֆլիսի մէջ արուեստասէր հասարակայնութեան ներկայացուցիչներ:

Ցուցահանդէսին իրենց աշխատանքները ներկայացուցած էին Թիֆլիսի, Սամցխէ-Ջաւախքի նկարիչները: Ցուցահանդէսի բացումը կատարեց Վիրահայոց թեմի մշակոյթի բաժինի տնօրէն, «Հայարտուն» կեդրոնի համակարգող Լեւոն Չիդիլեան:  Պրն Չիդիլեան կարեւոր նկատեց  այն, որ արդէն 2-րդ տարին է` Հայոց մեծ եղեռնի զոհերու յիշատակին նուիրուած ձեռնարկներու շարքը Վիրահայոց թեմէն ներս կը մեկնարկէ  Եղեռնի թեմայով  ցուցահանդէսով:  Վրաստանի հայ նկարիչներու միութեան նախագահ Մերուժան Շահումեան արժեւորեց վրացի նկարիչներու մասնակցութիւնը ցուցահանդէսին եւ  օժանդակութիւնը  ցուցահանդէսի կազմակերպման աշխատանքներուն: Միութեան նախագահը իր  խօսքին մէջ տեղեկացուց, որ ցուցահանդէսին մասնակցած 25 նկարիչները  աւելի քան 60 կտաւներու միջոցով իրենց  ցասումը արտայայտած են աշխարհի անտարբերութեան դէմ`  պահանջելով արդարութիւն եւ հատուցում` անմեղ նախնիներու տառապանքներու եւ դաժան նահատակութեան համար:

Վրաստանի հայ մտաւորականներու միութեան նախագահ Ենոք Թադեւոսեան  ներկաներուն յիշեցուց մի քանի օր առաջ Քեսապի հայութեան աջակցութեան  համար  ՄԱԿ- ի ներկայացուցչութեան  եւ Թուրքիոյ դեսպանութեան առջեւ թիֆլիսահայութեան  իրականացուցած բողոքի գործողութիւնները: Բանախօսը ներկաներուն մանրամասնօրէն  ծանօթացուց Քեսապի  տեղադրութեան վայրին,  ներկայացուց պատմական  այն ուղին, որուն ընթացքին հայաբնակ Քեսապը եւ յարակից շրջանները արդէն 3-րդ անգամ  կ’ենթարկուին  ցեղասպանութեան եւ  տեղահանութեան:

Վերջաւորութեան  Վիրահայոց թեմի առաջնորդ Գերաշնորհ Տ. Վազգէն եպիսկոպոս Միրզախանեան իր օրհնութիւնը բաշխեց բոլոր մասնակիցներուն, բարձր գնահատեց այս ձեռնարկը եւ վրացի նկարիչներու մասնակցութիւնը:  Սրբազան հայրը  նմանատիպ ձեռնարկները համարեց  յուշակոթող հայ նահատակներուն: Վիրահայոց առաջնորդը  ոգեկոչեց ներկաներուն նուիրուելու  Հայաստանի եւ հայութեան գեղեցիկ ապագայի շինարարութեան, որպէսզի  այլեւս  ոչ մէկ ոսոխ  չսպառնայ  ստեղծարար հայուն իր  դրած տուն ու տեղէն  տեղահան ընելու:

Ցուցահանդէսը կը շարունակուի մինչեւ ապրիլ 30:

                                                                                                                                                                                                                                                                                                             Վիրահայոց թեմի մամլոյ դիւան