Թուրքիա բնակող հայ լեզուաբան Սեւան Նիշանեան, որ առանց որեւէ յստակ հիմնաւորման թրքական արդարադատութեան կամայականութեան որպէս արդիւնք Թորպալըի բաց բանտէն տեղափոխուած էր Իզմիրի Պուճա փակ բանտ, այստեղ կ’ենթարկուի խտրականութեան եւ բռնութիւններու:

Ինչպէս կը հաղորդէ «Արմէնփրէս»-ը` վկայակոչելով թրքական Aykiridogrular.com-ը, նոր բանտին մէջ Նիշանեանին յայտարարած են, որ այլեւս մահճակալ չունին, որու արդիւնքով լեզուաբանը ստպուած կը քնանայ բետոնէ յատակին:   Կը հաղորդուի, որ Նիշանեանին չի թոյլատրուիր նոյնիսկ լոգանք ընդունել:
Թուրքիոյ մէջ խումբ մը մտաւորականներ, որոնք լեզուաբանի ձերբակալութենէն ետք կը շարունակեն բարձրաձայնել տեղի ունեցած անարդարութեան մասին, յայտարարած են, որ կատարուածը պարզապէս կը բնութագրուի որպէս տանջանք:

Դեռեւս Թորպալըի բաց բանտին մէջ Նիշանեանի գրած վերջին նամակներէն մէկուն մէջ մտաւորականը տեղեկացուցած էր, որ վերջին յօդուածներէն մէկուն պատճառով իր դէմ հետաքննութիւն  սկսած են` ծառայողներէն մէկուն նուաստացնելու մեղադրանքով: Բանտի տնօրէնը անոր կանչած է իր մօտ, եւ հայ մտաւորականէն ցուցմունք  վերցուցած: Նիշանեան կանխազգացած էր, որ մի քանի օր ետք իրեն կրնան տեղափոխել փակ բանտ:

«Իրական պատճառն այդ յօդուածը չէր: Ինչ եկած եմ այս բանտ, կ’ըսեն, թէ այստեղի «խերը» կորսուած է: Երթամ, որ կարենամ հանգիստ շունչ քաշել»,- ըսած է Նիշանեան:

Աւելի առաջ Նիշանեան նամակ գրած էր լրագրող Հասան Ճեմալին, ուր յայտնած էր, որ բանտին մէջ իրեն այնպէս չեն վերաբերիր, ինչպէս միւս ազատազրկուածներուն: Անոր խօսքով, «վերեն եկած կարգադրութեամբ» ինքը խտրական վերաբերմունքի կ’ենթարկուի:
Թուրքիոյ արդարադատութիւնը մեղաւոր ճանչցած էր հայազգի լեզուաբանին «սեփական հողակտորի վրայ ապօրինի շինարարութիւն կատարելու» համար: Նիշանեան, որ դատապարտուած էր երկու տարուան ազատազրկման, պատիժը յունուար 2-էն կը կրէր Իզմիր քաղաքի Թորպալը բանտին մէջ: Դատարանի թոյլտուութեամբ ան կրցած  էր մօտ մէկ շաբաթով դուրս գալ բանտէն:

Անոր որդին`Արսէն Նիշանեան, յայտնած էր, որ հայրը երեք ամիսը մէկ հնարաւորութիւն կ’ունենայ 3-4 օրով գտնուիլ ազատութեան մէջ:

http://armenpress.am/