Համաշխարհային ճանաչում ձեռք բերած հայ ջութակահար Սերգէյ Խաչատրեան ստացած է զուիցերական Credit Swiss դրամատան ամենամեայ մրցանակը` ճանչցուելով որպէս`

«Աշխարհի լաւագոյն երիտասարդ երաժիշտ»: Այս մասին ինչպէս կը փոխանցէ
«Արմէնփրէս»-ը` վկայակոչելով novostink.ru կայքը, ջութակահարին
պարգեւատրելու արարողութիւնը տեղի  ունեցած է Վիեննայի մէջ յունուար 18-ին:
ժիւրիի կազմը գլխաւորած է Լիւցեռնի փառատօնի գեղարուեստական ղեկավար
Միխայիլ Գաֆլիգերը:

Միաժամանակ Սերգէյ Խաչատրեան արժանացած է նաեւ մրցանակի` զուիցերական 75
հազար ֆրանք գումարի չափով, որ երաժշտական բնագաւառին մէջ «Ամենաթանկ»
մրցանակներէն մէկն է: Մրցանակը նաեւ կ’ենթադրէ, որ ջութակահարը
պիտի մասնակցի Վիեննայի ֆիլհարմոնիք նուագախումբի հետ համերգի: Այն Գուստաւօ
Տուտամելեայի ղեկավարութեամբ տեղի պիտի ունենայ սեպտեմբեր 13-ին: Google+
համակարգին մէջ զուիցերական դրամատան վերջին հրապարակային գրուածքը կը վերաբերի
հայ երիտասարդ երաժիշտին. անոր շնորհաւորած են յաջողութեան ու կոչման
արժանանալու համար:

Սերգէյ Խաչատրեանի վերջին համերգը Երեւանի մէջ կայացած է 2013 թ. սեպտեմբեր
15-ին, երբ ան «Արամ Խաչատրեան» համերգասրահին մէջ հանդէս եկաւ Հայաստանի
պետական երիտասարդական նուագախումբին հետ: Սերգէյ Խաչատրեան կը նուագէ 1740
թ. Ջ.Գվարներիի ստեղծած «Իզայի» ջութակով, որ անոր սիրով տրամադրած է
ճափոնական Nippon երաժշտական հիմնադրամը: Համերգի նախօրէին հրաւիրուած
ասուլիսին Խաչատրեան խոստովանած էր, որ սեփական ժողովուրդին համար նուագելը
իւրայատուկ զգացողութիւն է, որ այլ բեմերու վրայ հնարաւոր չէ զգալ:

armenpress.am