Ամերիկայի Հայ Դատի յանձնախումբին կողմէ իրականացուած շուկայական հարցախոյզին արդիւնքները ցոյց կու տան, որ զօրաւոր եւ լայնածաւալ աջակցութիւն ու պահանջ կայ Լոս Անճելըս-Երեւան ուղղակի թռիչքներ հաստատելու նախաձեռնութեան։

Արդարեւ, հարցախոյզը ցոյց տուած է, որ Լոս Անճելըսի միջազգային օդակայանին (LAX) եւ Երեւանի «Զուարթնոց» միջազգային օդակայանին (EVN) միջեւ ուղղակի թռիչք հաստատելու անհրաժեշտութիւն գոյութիւն ունի: Հարցախոյզը կատարուած էր այս տարուան Մայիս 3-էն մինչեւ Յունիս 13 , իսկ անոր մասնակցած էին առաւել քան 2200 ամերիկահայեր, մեծ մասմաբ՝ Քալիֆորնիայէն:

«Հայ Դատի յանձնախումբը շնորհակալութիւն կը յայտնէ բոլոր անոնց, որոնք մասնակցեցան մեր շուկայական հարցախոյզին, որուն նպատակն էր ուսումնասիրել Լոս Անճելըս-Երեւան ուղղակի թռիչքներուն պահանջին ծաւալը»,- կը յայտնէ օդանաւային փոխադրական հարցերու մասնագէտ Զանգու Արմէնեան՝ աւելցնելով, որ այս քաջալերական արդիւնքները վստահաբար հետաքրքրութիւն պիտի ստեղծեն օդանաւային ընկերութեանց, ինչպէս նաեւ  Ուաշինկթընի ու Երեւանի քաղաքական շրջանակներու մէջ, որոնց աջակցութիւնը անհրաժեշտ է նման թռիչքներ իրականութեան վերածելու աշխատանքին մէջ:

Յատկանշական է, որ հարցախոյզին մասնակցողներուն 97 տոկոսը պատրաստակամութիւն  յայտնած է հրաժարելու ներկայիս դէպի Հայաստան երթալու համար իր օգտագործած օդանաւային ընկերութենէն, եթէ Երեւան հասնելու համար նման ուղղակի կապ մը հաստատուի։

Նաեւ, մասնակցողներուն մեծամասնութիւնը պատրաստ է 100էն մինչեւ 800 տոլար յաւեալ գումար վճարելու, օգտուելու համար առանց միջանկեալ կանգառի Լոս Անճելըս-Երեւան երթուդարձի թռիչքներէն։

Ըստ հարցախոյզին՝ ներկայիս Հայաստան ճամբորդողներուն 58 տոկոսը Երեւան կը հասնի Մոսկուայի (SVO) միջոցաւ, իսկ յաջորդ նախընտրելի օդակայաններն են՝ Տոհան (DOH, 14 տոկոս) եւ Փարիզը (CDG, 9 տոկոս):

Յատկանշական է նաեւ, որ Հայաստան ճամբորդողներուն 58 տոկոսը տարին մէկ անգամ կը կատարեն այդ ուղեւորութիւնը, իսկ 35 տոկոսը՝ տարեկան 2 կամ 3 անգամ։ Նաեւ, ճամբորդութեանց 72 տոկոսը տեղի կ՛ունենայ Մայիսէն Սեպտեմբեր ժամանակահատուածի ընթացքին։

Զանգու Արմէնեան կը յայտնէ, թէ վերջին տարիներուն աճ կ՛արձանագրէ թէ՛ Հայաստան ճամբորդողներու թիւը եւ թէ հոն իւրաքանչիւր ճամբորդի կողմէ ծախսուող գումարը, նման թռիչքներու հաստատումը աւելի հրատապ դարձնելով։

Ամերիկայի Հայ Դատի յանձնախումբը կոչ ըրած է Միացեալ Նահանգներու փոխադրական հարցերու նախարարութեան, ամերիկեան օդանաւային ընկերութիւններուն եւ համապատասխան պետական մարմիններուն՝ նեցուկ կանգնելու Լոս Անճելըս-Երեւան ուղղակի թռիչներ հաստատելու ծրագիրին։

Հարցախոյզին ամբողջական տուեալներուն կարելի է ծանօթանալ՝ այցելելով anca.org/lax2evn կայքէջը։