Մայիս 21-ին` ֆրանսահայ աշխարհահչակ շանսոնյէ Շառլ Ազնաւուրի ծննդեան նախօրէին, Ազնաւուր ընտանիքի փարիզեան առաջին բնակարանի պատին յուշատախտակ մը տեղադրուած է:

Ինչպէս կը տեղեկացնէ «Հայերն այսօր»-ը, բացման հանդիսաւոր արարողութեան ներկայ  եղած են  Փարիզի քաղաքապետ Անն Հիդալկոն, քաղաքային իշխանութիւններու, ֆրանսահայ համայնքի ներկայացուցիչներ, նշանաւոր անձիք եւ, ի հարկէ, Ազնաւուր ընտանիքի անդամները:

Յուշատախտակը տեղադրուած է Փարիզի 6-րդ շրջանի Մսիօ լը Փրենս 36 հասցէին, ուր Փարիզ ժամանելէն  յետոյ բնակութիւն  հաստատած է Ազնաւուրեաններու ընտանիքը, ուր եւ անցած է Շառլ Ազնաւուրի մանկութիւնը:

«Զգացուած եմ, որ մեր սերունդներուն համար զետեղուեցաւ աշխարհահռչակ հայու յուշատախտակը, ինչպէս նաեւ շնորհակալ եմ Ֆրանսային՝ իր զաւակները չմոռնալու համար»,-«Հայերն այսօր»-ին հետ զրոյցին ըսաւ  ձեռնարկին ներկայ ֆրանսաբնակ օփերայի երգիչ Ադամ Պարրոն:

Աւելցնենք, որ մեծանուն արուեստագէտի ծննդեան տարեդարձին ընդառաջ եւ ամբողջ տարուան ընթացքին  աշխարհի տարբեր անկիւններու մէջ անոր  արուեստը նշանաւորող ձեռնարկներ` ցուցահանդէսներ, համերգներ, յուշարձաններու բացում, հանրային վայրերու, հաստատութիւններու անուանակոչութիւն պիտի կազմակերպուին:

Մայիս 22-ին կը լրանայ յայտնի արուեստագէտ Շառլ Ազնաւուրի  95-ամեակը: