Մայիս 22-ին կը լրանայ «Ազնաւուր» հիմնադրամի համահիմնադիր, յայտնի արուեստագէտ Շառլ Ազնաւուրի 95-ամեակը:  Հիմնադրամէն կը յայտնեն, որ մեծանուն արուեստագէտի ծննդեան տարեդարձին ընդառաջ եւ ամբողջ տարուան ընթացքին  աշխարհի տարբեր անկիւններու մէջ անոր  արուեստը նշանաւորող ձեռնարկներ կը կազմակերպուին` ցուցահանդէսներ, համերգներ, յուշարձաններու բացում, հանրային վայրերու, հաստատութիւններու անուանակոչութիւն:

Մեծ արուեստագէտի 95-ամեակի առթիւ Փարիզի քաղաքապետարանը, համագործակցելով «Ազնաւուր» հիմնադրամին հետ, Ազնաւուրի  ծննդեան օրուան նախօրէին` մայիս 21-ին, Ֆրանսայի մայրաքաղաքին մէջ  կը կազմակերպէ հետեւեալ ձեռնարկները`

Մայիս 21-ին` Փարիզի  ժամանակով 11:15-ին, Ազնաւուր ընտանիքի փարիզեան առաջին բնակարանի հասցէին մէջ կը բացուի յուշատախտակ` Փարիզի քաղաքապետ Անն Հիդալկոյի, քաղաքային իշխանութիւններու, նշանաւոր անձանց եւ, ի հարկէ, Ազնաւուր ընտանիքի անդամներու ներկայութեամբ:

Յուշատախտակը կը տեղադրուի Փարիզի 6-րդ շրջանի Մսիօ լը Փրենս 36 հասցէին, ուր Փարիզ ժամանելէ յետոյ բնակութիւն  հաստատած է Ազնաւուրեաններու ընտանիքը, եւ ուր անցած է Շառլ Ազնաւուրի մանկութիւնը:

Տօնակատարութիւնը համերգային ձեւաչափով կը շարունակուի Փարիզի քաղաքապետարանին յարող հրապարակին վրայ, ուր Փարիզի ժամանակով ժամը 17:00-էն կը սկսի համերգ` նուիրուած Ազնաւուրի տարեդարձին:

Համերգին ելոյթներով հանդէս կու գան Փարիզի քաղաքային երգչախումբը, Անտրէ Մանուկեանը, Ժոանա Մենդիլը, Եսայի Ալթունեանը, Ազնաւուրին նուագակցած դաշնակահար Էրիկ Պերշոն եւ այլ երաժիշտներ: