Հանրապետութեան նախագահ Արմէն Սարգսեան այսօր ընդունած է «Վերադարձ Հայաստան» հիմնադրամի համահիմնադիրներ, տնօրէն Վարդան Մարաշլեանը եւ հոգաբարձուներու խորհուրդի նախագահ Րաֆֆի Քասարջեանը:

Ինչպէս «Հայերն այսօր»-ին կը յայտնեն ՀՀ նախագահի մամլոյ ծառայութենէն, հիւրերը նախագահ Սարգսեանին  ներկայացուցած են հիմնադրամի գործունէութիւնը, իրականացուող ծրագիրներն ու յառաջիկայ ընելիքները: Անոնք ընդգծած են, որ հիմնադրամի գործունէութեան կարեւորագոյն ուղղութիւնը հայրենադարձութիւնն է եւ Հայաստանի հետ Սփիւռքի մեր հայրենակիցներու կապի սերտացումը:

Հանրապետութեան նախագահը պատրաստակամութիւն  յայտնած է աջակցելու հիմնադրամի գործունէութեան` նշելով, որ այն կարեւոր գործ կ՛իրականացէ արտերկիր բնակող մեր հայրենակիցներուն Հայաստան հաստատուելու եւ մայր հայրենիքի հետ կապելու տեսանկիւնէն:

Զրուցակիցներն անդրադարձած են նաեւ համատեղ ծրագիրներ իրականացնելու հնարաւորութիւններուն: