Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսի օրհնութեամբ Մայր Աթոռ Սուրբ Էջմիածինի Հրատարակչական բաժինը Մայր Աթոռի Արխիւի նախաձեռնութեամբ լոյս  ընծայած է «Վաւերագրեր Հայ Եկեղեցու պատմութեան» ժողովածուի երկրորդ հատորը: Այս մասին կը հաղորդեն Մայր Աթոռի Տեղեկատուական համակարգէն:

Այստեղ ներկայացուած են 302 բազմաբնոյթ փաստաթուղթեր, որոնք կը վերաբերին Գէորգեան հոգեւոր ճեմարանին, Մայր Աթոռի թանգարանին, «Արարատ» ամսագիրին, ինչպէս նաեւ երջանկայիշատակ Գէորգ Դ Ամենայն Հայոց Կաթողիկոսի կրօնաեկեղեցական գործունէութեան:

Հատորին մէջ ներառուած փաստաթուղթերը կը թուագրուին 1866-1923 թթ. եւ բաղկացած են հետեւեալ բաժիններէն` «Փաստաթուղթեր», «Կենսագրական բառարան», «Անձնանուններու ցանկ», «Տեղանուններու ցանկ», «Փաստաթուղթերու ցանկ»:

Ժողովածուն կազմած է Գոհար Աւագեան` ՀՀ Ազգային արխիւի տնօրէն Ամատունի Վիրաբեանի խմբագրութեամբ: Հատորի կազմման աշխատանքներուն աջակցած է նաեւ ՀՀ Մշակոյթի նախարարութիւնը:

Գիրքը հրատարակուած է «Սարգիս Գաբրիէլեան» հիմնադրամի մեկենասութեամբ: