Ծանօթ դաշնակահար Շահան Արծրունիի ծննդեան 75-ամեակին նուիրուած համերգը, որ տարւոյս Ապրիլ 5-ին տեղի ունեցաւ Նիւ Եորքի Alliance Française Florence Gould սրահին մէջ, ողջունուեցաւ ներկայ երաժշտասէր հոծ բազմութեան բուռն ծափահարութիւններով։ Նուագահանդէսը կազմակերպուած էր Հայկական բարեգործական ընդհանուր միութեան, ինչպէս նաև Ամերիկայի արևելեան թեմի առաջնորդարաններու, Հայ օգնութեան ֆոնտի, Հայ ժողովուրդի անմիջական օգնութեան և Հայկական ռատիոժամի կողմէ։

Այս նշանակալից տարեդարձին առիթով յայտնի դաշնակահար, յօրինող, երաժշտագէտ և ուսուցիչ Շահան Արծրունի հմայեց ներկաները ներկայացնելով ինքնատիպ յայտագիր մը, որուն մաս կը կազմէին դասական և հայկական երաժշտութենէն նմոյշներ։ Համերգի ընթացքին ան պատմեց դրուագներ և տուաւ բացատրութիւններ Ալան Յովհաննէսի և Եդուարդ Միրզոյեանի անձերուն և գործերուն մասին։ Անոնք Արծրունիի մօտիկ բարեկամները եղած էին։

Շահան Արծրունի ելոյթ ունեցած է աշխարհի չորս ծագերուն և արժանացած է մեծ գնահատանքի։ Ան ծանօթ է որպէս հայկական երաժշտութեան ջերմ հաւատացող մը և ամէն ջանք ի գործ դրած է տարածելու համար ազգային մշակոյթը։ Առ ի գնահատութիւն իր մշակութային անխոնջ ծառայութեան ան արժանացած է Հայաստանի հանրապետութեան Մովսէս Խորենացիի անուան նախագահական շքանշանին։ 2003 թուականին, Արամ Խաչատուրեանի ծննդեան 100-ամեակին առթիւ, ան նշանակուած է Հայաստանի մշակութային նախարարութեան ներկայացուցիչը։ Արծրունի ստացած է նաև Ս. Սահակ և Ս. Մեսրոպ շքանշանը և Հայրապետական կոնդակը՝ լուսահոգի Գարեգին Ա. Ամենայն հայոց կաթողիկոսին կողմէ։

Ամերիկայի արևելեան թեմի առաջնորդ Հոգշ. Տ. Դանիէլ Վրդ. Ֆընտըգեան իր ուղերձին մէջ կը գրէ. «Արծրունի անզուգական է հայկական երաժշտութեան ժառանգը տարածելու իր առաքելութեան մէջ։ Ան ոչ միայն կը տարածէ մեծն Խաչատուրեանի, Յովհաննէսի և անմահ Կոմիտասի ստեղծագործութիւնները, այլ նաև՝ Միրզոյեանի, Պապաճանեանի, Մանսուրեանի և Զաքարեանի նման յօրինողներու գործերը»։ Հայկական երաժշտութիւնը ծանօթացնելու իր առաքելութեան բերմամբ՝ Արծրունի իբրև բազմակողմանի արուեստագէտ և մշակոյթի անխոնջ դեսպան, մեծապէս գնահատուեցաւ ամբողջ համերգի ընթացքին։ New York Concert Review-ի գրախօսականը կ՚ըսէ. «Ծրագիրը լի էր նրբութիւններով և նորութիւններով, զորս՝ հիանալի մթնոլորտի մը մէջ՝ Արծրունի վառ գոյներով ի յայտ բերաւ։

Համերգի աւարտին տեղի ունեցաւ յատուկ ընդունելութիւն մը Հայկական բարիգործական ընդհանուր միութեան կեդրոնին մէջ։ Նկատի ունենալով Արծրունիի երկար տարիներու գործակցութիւնը Միութեան հետ (1964-էն սկսեալ մինչև ներկայ օրերս), նախագահ Պերճ Սեդրակեան այսպէս արտայայտուեցաւ. «Շահան Արծրունի եզակի երեւոյթ մըն է։ Մեր նպատակն է նոր սերունդը ներշնչել և անոնց ներկայացնել օրինակներ իրենց ինքնութիւնը աւելի լաւ ճանչնալու և պահպանելու համար։ Ահա՛, Արծրունի այդ անձն է»։

Հայկական Բարեգործական Ընդհանուր Միութիւնը (Հ.Բ.Ը.Մ.) աշխարհի մեծագոյն ոչ-շահամէտ հայկական կազմակերպութիւնն է, նուիրուած հայեցի ինքնութեան եւ ժառանգութեան պահպանումին եւ մշակումին՝ կրթական, մշակութային եւ մարդասիրական ծրագիրներով: Միութեան գործունէութիւնները բարերար ազդեցութիւն կը բերեն տարեկան 500,000-է աւելի անձերու կեանքերէն ներս,  Հայաստանի ու Արցախի մէջ եւ Սփիւռքի տարածքին: Իր հիմնադրութենէն ի վեր, Հ.Բ.Ը.Մ.ը հաւատարիմ մնացած է համայն հայութեան բարօրութեան ապահովումին ուղղուած իր գլխաւոր առաքելութեան: Յաւելեալ տեղեկութիւններու համար՝ այցելեցէք www.agbu.org կայքէջը: