Հայ Օգնութեան Միութիւնը, ՀՅԴ Հայաստանի Երիտասարդական Միութեան, ՀՅԴ «Նիկոլ Աղբալեան»  ուսանողական միութեան, ՀՅԴ Ազատամարտիկներ յանձնախումբի, Հ.Մ.Ը.Մ.-ՀԱՍԿ, Համազգային հայ կրթական եւ մշակութային միութեան հետ համատեղ մարտ 30-ին ժամը 11:00-ին Եռաբլուր Պանթէոնին մէջ կը կազմակերպէ ծառատունկ` ի յիշատակ Ապրիլեան պատերազմի զոհերուն: Այս մասին կը տեղեկացնեն ՀՕՄ Հայաստանէն:

Ձեռնարկին ընթացքին «Ոսկրածուծի նուիրատուներու հայկական հիմնարկ» բարեգործական հիմնադրամը, որ կը զբաղի Հայաստանի մէջ արեան հիւանդութիւններով տառապող երեխաներու բուժմամբ, յատուկ տաղաւարի մէջ պիտի իրականացնէ կամաւորներու գրանցումը:

Նշենք, որ կամաւորներու  նուիրատուութեան  գործընթացը անվնաս եւ անցաւ է, կը տեւէ հաշուած վայրկեաններ, սակայն հնարաւորութիւն կու տայ յետագային, համատեղելիութեան յայտնաբերման պարագային, փրկել կեանքեր:

Ձեռնարկին ընթացքին կ’իրականացուի նաեւ հանգուցեալ ՀՕՄ-ուհիներու, զոհուած ազատամարտիկներու, զինծառայողներու հոգեհանգստեան արարողութիւն: