Պելճիքայի հայ համայնքի ներկայացուցիչներու վեհաժողովը փետրուար 28-ին ընտրած է իր նոր գործադիր մարմինը` Պելճիքայի հայերու կոմիտէն:

Ինչպէս «Հայերն այսօր»-ին կը յայտնեն կոմիտէէն, Պելճիքայի հայերու կոմիտէն կը նախագահէ Նիկոլա Դաւիթեանը, իսկ անդամներն են` Պետրոս Պետրոսեանը, Գարոլ Արիսեանը, Սելինա Սեվիմը, Կարօ Պարշտաքչեանը, Կարօ Կարապետը, Յարութ Շիրինեանը, Մարիամ Գլճեանը, Լոռի Մահմուրեանը, Վագա Մարտիրոսեանը, Մարիամ Ներսէսեանը եւ Սերգէյ Վարդանեանը: Այն կը յաջորդէ Կարէն Թադեւոսեանի նախագահած Կոմիտէին: Պելճիքայի հայերու կոմիտէն հայերու միասնական ներկայացուցչութիւնն է, յատկապէս երկրի իշխանութիւններուն հետ յարաբերութիւններուն` արտացոլելու իրենց բազմազանութիւնը:

Պելճիքայի հայ համայնքը ձեւաւորուած է 1922թ-ին` ներկայացնելու 1915թ-ի ցեղասպանութեան հետեւանքով երկիր գաղթած հայերուն: 1970թ-էն սկսած Լիբանանէն, Թուրքիայէն, Հայաստանէն եւ ի վերջոյ Սուրիայէն ժամանած հայերը միացան փոքրիկ համայնքին: Այժմ, ընդհանուր առմամբ, հայկական ծագում ունեցող Պելճիքայի քաղաքացիներու ու կացութիւն ունեցող բնակիչներու թիւը կը հասնի մօտաւորապէս 30 հազարի:

Պելճիքայի մէջ հայկական համայնքային հիմնարկները կը ներկայացնեն միասնական եւ ժողովրդավարական բնոյթ կրող օրինակ: Վեհաժողովը եւ Պելճիքայի հայերու կոմիտէն ի սկզբանէ ունին առաքելութիւն պահպանել եւ ներկայացնել հայկական քաղաքակրթութեան ժառանգութիւնը, որուն մեծ մասը ոչնչացուած է 20-րդ դարուն` Թուրքիոյ մէջ, ինչպէս նաեւ Մերձաւոր Արեւելքի եւ Արեւելեան Եւրոպայի մէջ:

Պելճիքայի հայ համայնքը աւելի քան հազար տարուան պատմութիւն ունեցող սփիւռքի բաղադրիչներէն մէկն է: Այսօր այդ սփիւռքը ներկայ է հինգ մայրցամաքներու մէջ, ամբողջովին մասնակցած է Եւրոպայի զարգացման, սակայն քիչերը տեղեակ են իր պատմութեան: Այդ սփիւռքի աւանդոյթները հեշտացուցած են հայերու արագ ընդելուզումը Պելճիքայի մէջ: