Նախագահութեամբ Նեպիհ Պըրրիի, խորհրդարանը երէկ կէսօրէ առաջ գումարեց օրէնսդրական իր լիագումար նիստը, որուն ընթացքին ընտրեց նախագահներու եւ նախարարներու դատավարութեան Դատական գերագոյն խորհուրդի 7 անդամները:

ՀՅԴ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունի 95 քուէներով ընտրուեցաւ նախագահներու եւ նախարարներու դատավարութեան Դատական գերագոյն խորհուրդի անդամ: Կը հաղորդէ «Ազդակ»:

Խորհուրդին անդամ ընտրուեցան նաեւ Ժորժ Օքէյս, Ալի Ամմար, Ֆայսալ Սայեղ, Ժորժ Աթալլա, Սամիր Ժսըր եւ Էլիաս Հանքաշ:

Դատական գերագոյն խորհուրդի եօթը անդամներուն կողքին ընտրուեցան նաեւ փոխանդամներ Ռուլա Թապըշ, Սելիմ Աուն եւ Ալի Օսէյրան:

Միւս կողմէ, օրէնսդրական նիստի շրջագիծին մէջ երեկոյեան նիստին ընթացքին խորհրդարանը վաւերացուց ելեկտրականութեան ընկերութեան տրուելիք 794 միլիառ լ. ոսկիի յատկացում մը, որուն դէմ արտայայտուեցան Փաղանգաւոր կուսակցութեան երեսփոխաններն ու երեսփոխան Ուսամա Սաատ:

Վարչապետ Սաատ Հարիրի շեշտեց, որ կառավարութիւնը երեք ամսուան ընթացքին պիտի մշակէ ելեկտրականութեան մարզի վիճակի բնականոնացման ծրագիր մը:

Իր կարգին, Պըրրի շեշտեց Ելեկտրականութեան մարզի տնօրինման խորհուրդ մը կազմելու անհրաժեշտութիւնը` հաստատելով, որ խորհրդարանը ամսական դրութեամբ կառավարութեան հարցապնդման նիստ պիտի գումարէ:

Խորհրդարանը համաձայն գտնուեցաւ նաեւ, որ կառավարութիւնը օտար դրամանիշով վարկեր ստանայ, որպէսզի կարենայ պետական գանձարկղի նիւթական բացը ծածկել եւ երկրին սնանկացումը կանխարգիլել:

Առաւօտեան նիստին ընթացքին խորհրդարանի լիագումար նիստը որոշեց, որ կառավարութեան աշխատանքները մինչեւ 31 մայիս ֆինանսաւորուին 2019-ի պետական ամավարկէն դուրս, սակայն վարչապետ Հարիրիէն պահանջուեցաւ ամէնէն մօտիկ ապագային 2019-ի պետական ամավարկը մշակել եւ զայն խորհրդարան ներկայացնել:

Այս պահանջին լոյսին տակ ելեւմուտքի նախարար Ալի Հասան Խալիլ յայտնեց, որ կառավարութիւնը 2019-ի իր պետական ամավարկը կրնայ վաւերացնել մէկուկէս ամսուան ընթացքին եւ զայն փոխանցել խորհրդարան` պահանջելով, որ խորհրդարանը իր կարգին մէկուկէս ամսուան ընթացքին վաւերացնէ ամավարկը:

Այս առաջարկին համաձայն գտնուեցաւ Պըրրի, սակայն ելեւմուտքի եւ պետական ամավարկի երեսփոխանական յանձնախումբի նախագահ, երեսփոխան Իպրահիմ Քանաան խնդրեց խորհրդարանը մէկուկէս ամսուան ժամկէտով չսահմանափակել` աւելցնելով, որ իր յանձնախումբը մանրամասնօրէն պիտի քննարկէ պետական ամավարկը:

Նշենք, որ երեկոյեան նիստը աւարտեցաւ ժամը 8:30-ին, երբ խորհրդարանի լիագումարը որոշեց պետական դպրոցներու մէջ երկրորդական կարգերու ուսուցիչներ նշանակելու կանոններուն վերաբերող օրինագիծը փոխանցել կրթութեան հարցերու խորհրդարանական յանձնախումբին: