Փետրուարի 14-ին` 40-օրեայ մեր Տէր Յիսուս Քրիստոսի տաճարին ընծայման տօնին, Մայր Աթոռ Ս. Էջմիածնի միաբանութիւնը Պատարագի սրբազան արարողութեանը մասնակցեց Ս. Գայանէ վանքում:

Պատարագիչն էր Մայր Աթոռ Ս. Էջմիածնի միաբան, Ս. Գայանէ վանքի սպասաւոր Հոգեշնորհ Տ. Իգնատիոս վարդապետ Մալխասեանը:

Ս. Պատարագի ընթացքում իր քարոզում Հայր Սուրբն անդրադարձ կատարեց տօնի խորհրդին: Իգնատիոս վարդապետը մասնաւորաբար խօսեց Տիրոջ խոնարհութեան մասին, որին պէտք է հետեւող լինեն բոլոր հաւատացեալները: «Խոնարհութեան գերօրինակ մեր Տէրը՝ Յիսուս Քրիստոս, կատարեց իր իսկ հաստատած աստուածադիր բոլոր օրէնքները՝ աստուածային արդարութեան իրագործման համար եւ ի լրումն ու կատարումն օրէնքների, կամ ինչպէս շարականագիրն է ասում. «Այսօր տաճար եկար կատարելու օրէնքը՝ մարդկանց փրկութեան համար»: Իսկ մեզ աւանդեց եւ մատուցեց աստուածախօսային առաքինութիւն խոնարհութիւնը: Խոնարհութիւն, որ, վանելով ատելութիւն, ծնում է սէր, փոխան հակառակութեան, յուսահատութեան, թշնամութեան տարածում է ներդաշնակութիւն, յոյս, ներողամտութիւն, երջանկութիւն, մերժում է խաւարն ու ստուերը՝ սփռելով լոյս ու ջերմութիւն:

Խոնարհութիւն, որ խոնարհուեց աշակերտների ոտքերը լուանալու, խոնարհութիւն, որ խոնարհուեց մեղաւոր մարդուն իր մահուամբ սրբագործելու եւ աստուածացնելու», – ասաց պատարագիչը` ընդգծելով նաեւ, որ Աստուած ճշմարիտ լոյս է, որ լուսաւորում է մարդկանց կեանքը, ջերմացնում նրանց սիրտն ու հոգին, բիւրեղացնում եւ հրով ազնուացնում նրանց զգացմունքներն ու ձգտումները:

Հաւարտ Սուրբ Պատարագի, հանդիսապետութեամբ Մայր Աթոռի Վարչատնտեսական բաժնի տնօրէն Գերաշնորհ Տ. Մուշեղ եպիսկոպոս Բաբայեանի, կատարուեց նորապսակ զոյգերի օրհնութեան կարգ: Սրբազան Հայրը եւս Տեառնընդառաջի տօնի առիթով իր շնորհաւորանքներն ու երջանկութեան մաղթանքներն ուղղեց երիտասարդներին: