Ապօրինի շինարարութեան վերջ, հողազաւթման վերջ, օրինականացում պիտի չըլլայ, խնդիրներ մի՛ ստեղծէք, իր առաջին մամուլի ասուլիսի ժամանակ ըսաւ Երեւանի գլխաւոր ճարտարապետ Արթուր Մեսչեան: Ան նշեց, որ գլխաւոր ճարտարապետի պաշտօնը մինչեւ հիմա կարուած է քաղաքապետի ճաշակով:

«Ամենակարեւոր աշխատանքներէն մէկը պիտի ըլլայ այն, որ վերջնականապէս ճշդուի ճարտարապետի հիմնարկը, որ չանձնաւորուի այդ հիմնարկը, որ եթէ ուրիշ ճարտարապետ ալ գայ, ապա ան մշակուած գործառոյթով աշխատի»,-« Թերթ»-ի փոխամցմամբ ըսաւ ան եւ նշեց, որ գլխաւոր ճարտարապետը գործիքակազմ պէտք է ունենայ:

Ըստ անոր` ամենակարեւոր գործիքակազմը, որ անհրաժեշտ է կարգաւորելու ճարտարապետութեան ոլորտը, գրեթէ չկայ: Դիմելով քաղաքացիներուն` ան յայտարարեց. «Պուճաղային (կեղտոտ) աշխատանքին վերջ, ապօրինի շինարարութեան վերջ, հողազաւթման վերջ, օրինականացում պիտի չըլլայ, խնդիրներ մի՛ստեղծէք: Եթէ շինարարական ծրագիրները օրինական ճանապարհով փորձէք իրականացնել, կը խոստանամ, որ բոլոր հնարաւորութիւններով պիտի փորձենք հեշտացնել ձեր կեանքը»,-ըսաւ ան։

Արթուր Մեսչան նշեց, որ որոշ շինարարական աշխատանքներու ծրագիրներ զարմանք կ՛առաջացնեն, բայց «ագրեսիւ» շինարարութեան առումով ինչ-որ լուծումի փորձած են հասնիլ:

Ըստ անոր՝ «Հին Երեւան» նախագիծին մէջ ընդգրկուած որեւէ յուշարձան պիտի չքանդուի: «Անհրաժեշտ պիտի ըլլայ փոխել նախագծային լուծումները, որպէսզի այդ շէնքերը պահպանուին: Պատմական յուշարձաններու քանդման թեման եկէք համարենք սպառած»,-յորդորեց ան` վստահեցնելով, որ քանի դեռ ինք Երեւանի գլխաւոր ճարտարապետն է, ոչ մէկ յուշարձան պիտի քանդուի: «Այն սեփականատէրերը, կառուցապատողները, որոնք կը գնեն որեւէ հողատարածք, ուր կը գտնուի որեւէ յուշարձան, անոնք պարտաւոր պիտի ըլլան ֆինանսաւորելու այս յուշարձանի վերակառուցման աշխատանքները: Սա այն է, ինչ չէ եղած եւ պիտի ըլլայ անպայման»,-ընդգծեց գլխաւոր ճարտարապետը:

Արթուր Մեսչեան նշեց, որ Երեւանի կեդրոնին մէջ կան շինարարութիւններ, որոնք ինք արդէն կանգնեցուցած է, մինչ տեղի կ՛ունենայ տրամաբանական լուծումներ: «Կը կարծեմ` հնարաւորինս պիտի պակսեցնեմ այն ցաւը, որ այսօր կը տանջէ մեր բնակիչներուն, եւ ատկէ կը շահի մեր քաղաքն ու բնակիչները»,-նշեց ան: