Արցախի կառավարութեան եւ «Վիւա-սել- ՄՏՍ Արմէնիա» ընկերութեան համաֆինանսաւորմամբ Բերձորի մէջ նոր հիւանդանոց կը կառուցուի:

 Ըստ «Արցախփրես»-ի Արցախի քաղաքաշինութեան նախարարութեան շինարարութեան վարչութեան գլխաւոր մասնագէտ Լեւոն Հարոյան ըսած է, որ բժշկական հաստատութեան շինարարական աշխատանքները սկսած են  2012 թուականէն:

Անոր խօսքով` հիւանդանոցը եռյարկանի է` ներառեալ նկուղային յարկը: Շինարարական  աշխատանքներու մեծ  մասը  աւարտած  է: Այժմ  կ՛ընթանայ շինութեան ներքին յարդարման եւ յատակներու տեղադրման աշխատանքները: Պիտի իրականացուի նաեւ տարածքի բարեկարգում:

«Հիւանդանոցի շէնքը ամբողջութեամբ կը համապատասխանէ ժամանակակից  չափանիշներուն: Բերձորի բժշկական հաստատութիւնը պիտի ունենայ վիրահատարան, ծնարան, դիահերձարան, մանկական բաժանմունք եւ կայուն բուժման համար անհրաժեշտ բոլոր միջոցները»,- տեղեկացուցած է Հարոյան եւ նշել, որ հիւանդանոցը շահագործման պիտի յանձնուի 2019-ին: