Օգոստոսի 12-ին Հայաստանեայց Առաքելական Ս. Եկեղեցին մեծ շուքով նշեց Ս. Աստուածածնի Վերափոխման տօնը: Այս բերկրառատ օրուայ կապակցութեամբ, Միածնաէջ Մայր Տաճարում մատուցուեց Ս. Պատարագ: Պատարագիչն էր Մայր Աթոռ Սուրբ Էջմիածնի Դիւանապետ Գերաշնորհ Տ. Արշակ եպիսկոպոս Խաչատրեանը:

Սրբազան Հայրը, իր քարոզում անդրադառնալով տօնի խորհրդին եւ Սուրբ Աստուածածնի կերպարին, մէջբերեց Ղուկաս Աւետարանչի կողմից յիշատակուած ու Մարիամ Աստուածածնի կողմից արտաբերուած խօսքերը. «Ահաւասի՛կ ես մնում եմ Տիրոջ աղախինը, թող քո խօսքի համաձայն լինի ինձ» (Ղուկ. 1:38) եւ խօսեց այն բացառիկ խոնարհութեան եւ հնազանդութեան մասին, որը դրսեւորել էր Սուրբ Կոյսը Տիրոջ հանդէպ: Արշակ Սրբազանն ընդգծեց, որ մենք հնազանդ ենք Աստծուն՝ իրականացնելու այն առաքելութիւնը, որին կոչուած ենք, եւ որ Մարիամ Աստուածածինը հնազանդուեց Աստծուն, որպէսզի լոյս աշխարհ բերի Փրկչին:

«Մեր հաւատքի հայրը՝ Գրիգոր Լուսաւորիչը, հնազանդուեց Աստծուն՝ քրիստոնէութեան լոյսը Հայոց աշխարհում տարածելու համար: Սուրբ Տրդատը հնազանդուեց Աստծուն, որպէսզի դառնայ հովանաւորը քրիստոնէութիւնը Հայաստանում տարածման, Աւարայարի եւ Սարդարապատի քաջերը հնազանդուեցին Աստծուն եւ զոհաբերեցին իրենց կեանքը՝ ի սէր քրիստոնէութեան եւ ի սէր հայրենիքի: Այդպիսի հնազանդութիւն էր նաեւ արցախեան ազատամարտի տարիներին մեր քաջամարտիկների զոհողութիւնը, այդպիսի հնազանդութիւն է նաեւ այսօր մեր ժողովրդի կողմից դրսեւորուած հաւատարմութիւնն Աստծուն: Երբ մենք ասում ենք, որ հաւատարիմ ենք Աստուած քեզ, հնազանդ ենք քեզ, մենք ոչ ենք ասում բոլոր այն օտարամուտ բարքերին ու սովորոյթներին, այլասերուած նորամուծութիւններին, որոնք բացարձակապէս չեն տեղաւորւում մեր հաւատքի շրջանակներում եւ մեր հոգեւոր, կրօնական պատկերացումների մէջ: Եւ այսօր Աստուածածինն օգնութեան է եկել մեզ՝ իր հնազանդութեամբ նորոգելու մեր հաւատարմութիւնը, նորոգելու մեր ուխտը, որպէսզի շարունակենք հնազանդ լինել Աստծուն, բայց նաեւ երբեւէ հանդուրժողականութիւն չդրսեւորենք այն արատների, այն մեղքերի, այն շեղումների նկատմամբ, որոնք կարող են տեղ գրաւել մեր ազգային-եկեղեցական կեանքում» -ասաց Արշակ Սրբազանը:

Հաւարտ Ս. Պատարագի, հանդիսապետութեամբ Գերաշնորհ Տ. Նաթան արքեպիսկոպոս Յովհաննիսեանի, Ս. Տրդատի բաց խորանի վրայ կատարուեց Խաղողօրհնէքի արարողութիւնը:

Վերջում օրհնուած խաղողի ողկոյզները բաժանուեցին հաւատաւոր ժողովրդին: