Հայ կաթողիկէ Մեսրոպեան Արուեստից Վարժարանի տնօրէնութիւնը ուրախութեամբ կը յայտնէ, որ վարժարանի BP (պրէօվէ) եւ BT (պաքալորէա) դասարաններու աշակերտները բացառիկ յաջողութիւններ արձանագրեցին 2017-2018 տարեշրջանի պետական քննութիւններուն:

BP դասարանի բոլոր 25 աշակերտները, եւ BT աւարտական դասարանի 44 աշակերտներէն 43-ը յաջողեցան. առաջինին պարագային յաջողութիւնը եղաւ կատարեալ 100 առ հարիւր, երկրորդին պարագային համեմատութիւնը կազմեց 97.73 առ հարիւր: Աւելին, Մեսրոպեանի աշակերտները իրենց նիշերով դասուեցան յաջողութեան բարձր կարգերուն մէջ:

Ինչպէս նախորդ տարիներուն, Մեսրոպեան Արուեստից Վարժարանի աշակերտները  քննութիւններուն մասնակցեցան երեք տարբեր մասնագիտութիւններով` Համակարգչային գիտութիւն ու Հաշուապահութեան , Հիւրանոցային Կառավարում եւ  Մանկավարժութիւն:

Տնօրէնութիւնս կը շնորհաւորէ աշակերտները, խնդակցութիւն կը յայտնէ անոնց ծնողներուն եւ գնահատանք կ՛ուղղէ վարժարանի ուսուցիչներուն՝ անոնց կատարած աշխատանքին համար:

Տնօրէնութիւն
Հայ կաթողիկէ Մեսրոպեան Արուեստից վարժարանի