Դեռ 4 տարի առաջ` 2014-ին, երբ Երեւանի մէջ կ՛իրականացուէր Սփիւռքի նախարարութեան «Իմ Հայաստան» համահայ­կա­կան փառատօնը, Ղազախստանի հայերու միութեան նախագահ Էռնեստ Վարդերեսեանը որոշեց, որ յաջորդ փառատօնին Ղազախստանէն նոյնպէս պարախումբ կ՛ըլլայ: Եւ քանի որ, ինչպէս կը հաւաստեն անուանի գործարարին ճանչցողները, անոր խօսքը միշտ գործ կը դառ­նայ, Ալմաթի հասնելուն պէս ան ձեռնարկեց ազգային համոյթ ստեղծելու գործը: Այսպէս կազմաւորուեցաւ «Արաքս»ը, որուն կայացման գործին մէջ մեծ ներդրում ունին պարուսոյց, բեմա­դրիչ եւ գեղարուեստական ղեկավար Արթուր Յովհաննիսեանն ու անոր կինը` Տիանա Յովհան­նիսեանը: Շուտով խումբը համալրեցին նաեւ Ալմաթիի շնորհալի պարուսոյցներ  Խանի Տիլո­վան եւ Օսման Տիլովը, եւ  «Արաքս»-ը, կամաց-կամաց ձեռք բերաւ ուրոյն դիմագիծ ու մեծ  ճանաչում: Մասնակցութիւն համայնքային ձեռնարկներուն, իսկ յետոյ նաեւ համաքա­ղա­քային եւ հանրապետական ստուգատեսներուն. այսպիսին է Ալմաթիի  «Արաքս» պարախումբի անցած ուղին, որ այս տարի նշանաւորուեցաւ նաեւ միջազգային եւ համահայկական 3 փառա­տօններուն փայլուն մասնակցութեամբ: Ընդամէնը մէկ շաբթուան մէջ մեր տաղանդաւոր հայրենա­կիցները մասնակցեցան Թիֆլիսի մէջ կազմակերպուած «Ոսկէ եղջիւր» միջազգային փառա­տօնին, այնուհետեւ, մրցանակներու հարուստ աւարով ժամանեցին Երեւան, ուր անոնց կը սպասէին երկու` ոչ պակաս հեղինակաւոր ստուգատեսներ` Սփիւռքի հայ համայնքներու պարախումբերու համերգին` նուիրուած Հայաստանի Հան­րա­պե­տութեան հիմնադրման եւ Մա­յիսեան հերոսամարտերու 100-ամեակին, որ կազմակերպուած էր Սփիւռքի նախարա­րութեան կողմէ, ինչպէս նաեւ Կատարողական արուեստի միջազգային 9-րդ փառատօնին:

Մեր պատանի հայրենակիցներն ու պարախումբի ղեկավարները ջանք ու եռանդ չխնայեցին` ըստ արժանուոյն ներկայացնելու հայկական եւ ժողովրդական այլ պարեր եւ հէնց առաջին ելոյթէն նուաճեցին հանդիսատեսի եւ ներկայացուցչական ժիւրիի համակրանքը: Հայաստանեան աննախադէպ շոգը բնաւ չխանգարեց անոնց բացայայտելու-ճանչնալու-սիրելու իրենց պատմական հայրենիքը, իսկ Սփիւռքի նախարար Մխիթար Հայրապետեանի կոչը` կը խնդրեմ հայ մնացէք, աւելի ամրապնդեց սեփական արմատներուն հաղորդակցուելու, հայկական մշակոյթը սիրելու, զարգացնելու եւ տարածելու անոնց ձգտումը:

Սա դէպի հայրենիք բերող ճանապարհի առաջին քայլն էր: Վստահ ենք, որ հեռաւոր Ղազախստանի մէջ, ապրելով եւ արարելով որպէս այդ երկրի արժանի եւ օրինապաշտ քաղաքացիներ, մեր հայրենակիցներն ամէն ինչ պիտի ընեն` այնտեղ ըստ արժանուոյն ներկայացնելու նաեւ մեր ազգային մշակոյթը:

Քեզ բարի երթ ու նորանոր յաջողութիւններ, «Արա՛քս», ղազախստանեան հիւրընկալ հողին վրայ` ի նպաստ ժողովուրդներու բարեկամութեան եւ պարարուեստի տարածման: