Յունիս 1-2 Սերպիոյ մէջ տեղի ունեցած գօտիներով ըմբշամարտի եւ կազախ կուրեսիի Եւրոպայի մեծահասակներու առաջնութեան մէջ Արցախի ձիւդոյի ֆետերասիոնի սան Սօսէ Բալասանեան նուաճած է ոսկէ ու արծաթէ մետալներ` դառնալով Եւրոպայի ախոյեանի տիտղոսակիր:

Հայաստանի Ազգային մարզաձեւերու եւ Կոխի ֆետերասիոններու աջակցութեամբ Եւրոպայի մեծահասակներու առաջնութեան մէջ  55 քկ քաշային կարգին մէջ մասնակցած  է Սօսէ Բալասանեան  եւ  70 քկ քաշային կարգին մէջ`  Գոռ Մկրտչեան:

«Արցախպրես»-ի  թղթակիցի  հաղորդմամբ`  Եւրոպայի ախոյեանի տիտղոսակիր Սօսէ  Բալասանեանին  Ստեփանակերտի   «Մենք ենք` մեր սարերը» յուշակոթողին   մօտ  դիմաւորելու    գացած են   Արցախի ձիւդոյի ֆետերասիոնի սաները:

Ս. Բալասանեան,  պատմելով մրցաշարի մասին,  ըսած  է,  որ      առաջին օրը`  յունիս  1-ին,   ինք   գօտիներով ըմբշամարտ   մարզաձեւին մէջ   հինգ դժուարին յաղթանակ տանելով, դարձած  է  Եւրոպայի ախոյեանի   տիտղոսակիր:  Երկրորդ  օրը  կազախ կուրեսիի  մարզաձեւին մէջ   ան   երեք յաղթանակ եւ մէկ պարտութիւն    գրանցած է եւ    արժանացած   արծաթէ մետալի:

Ս. Բալասանեան  յաջողութեան   համար  շնորհակալութիւն    յայտնած է    իր     մարզիչին` Իւան Ազիզբեկեանին:

Արցախի ձիւդոյի ֆետերասիոնի գլխաւոր մարզիչ Իւան Ազիզբեկեանն  ալ  ըսած է, որ   արցախցի   մարզիկները, մասնակցելով       միջազգային    մրցաշարերու,   յաղթանակներ  կը    գրանցեն`   բարձր    պահելով    Արցախի    դրօշը, արցախցիի  պատիւը: