Սփիւռքը որպէս փողի աղբիւր դիտարկելը ճիշդ չէ: ՀՀ նախագահ Արմէն Սարգսեան «Հայաստան» համահայկական հիմնադրամի հոգաբարձուներու խորհուրդի նիստի ընդմիջման լրագրողներուն հետ զրոյցին իր մտահոգութիւնը յայտնեց այս առնչութեամբ:

«Մենք խօսում ենք ազգային միասնութեան մասին, խօսում ենք այն մասին, որ սա փոքր երկիր է, բայց մեծ ազգ` աշխարհով մէկ: Շարժման օրերին մենք տեսանք, թէ ինչպէս էին աշխարհի տարբեր երկրներից մեր հայրենակիցներն ակտիւօրէն մասնակցում: Ոմանք ակտիւ էին սոցիալական ցանցերում, ոմանք`անձամբ գալիս էին: Հիմա հարց է ծագում, արդեօ՞ք Սփիւռքը իսկապէս նրա համար է, որ դրսից դրամ ուղարկի եւ որեւէ իրաւունքներ, մասնակցութիւն  չունենայ երկրի զարգացմանը: Ես կարծում եմ, որ դա բացարձակապէս սխալ մօտեցում է»,-Արմէնփրեսի փոխանցմամբ, ըսաւ Արմէն Սարգսեան: ՀՀ նախագահն ընդգծեց, որ Սփիւռքի մէջ ապրող մեր հայրենակիցները պէտք է ունենան եւ՛ պարտականութիւններ, եւ՛ իրաւունքներ:

«Մեր նպատակներից մէկը պէտք է լինի ճիշդ, ազնիւ, բաց ձեւով Սփիւռքը ներգրաւելը երկրի զարգացման գործում:  Այսօր Հայաստանի, Սփիւռքի միջեւ կան հոգեբանական իրաւական պատնէշներ, եւ մենք պէտք է դրանք վերացնենք: Եթէ դա չվերացնենք, ապա սփիւռքահայը կը շարունակի դիտարկուել որպէս օգնող, եւ Հայաստանում իրաւունքներ չունենայ, ինչը ճիշդ չէ: Գուցէ մէկ օր հասնենք նրան, որ Սփիւռքում ապրող մեր հայրենակիցները, ովքեր Հայաստանի քաղաքացիութիւն ունեն, հնարաւորութիւն ստանան մասնակցել ընտրութեանը»,-ըսաւ Արմէն Սարգսեան: