Լիա եւ Պօղոս Տումանեաններու դուստրը՝ Նարօտը, ապրելով եւ ստեղծագործելով հանդերձ  արտասահմանի մէջ, իսկական հայուհիի վառ օրինակ է:

Յատկանշական է, որ ան 16 տարեկան հասակին կրնայ գոյն հաղորդել եւ յոյս ներշնջել  բազում երեխաներու սեւ-ճերմակ կեանքին:

Հ- Նարօտ, պատմեցէք Ձեր մասին: Ուր ծնած էք: Երբ սկսած էք զբաղիլ նկարչութեամբ: Ինչ յաջողութիւններու հասած էք մինչ օրս:

Պ- Ծնողներս Այնճարէն են, ես ծնած եմ Յորդանան՝ Ամմանի մէջ: Մանկութենէս զբաղած եմ նկարչութեամբ: Տարաբնոյթ նկարչական դասընթացներու հետեւած եմ: Մասնակցած եմ եւ առաջին տեղը զբաղեցուցած եմ դպրոցական մրցոյթներուն, սակայն «Արուեստի սերմեր» նախագիծը կը համարուի իմ առաջին անհատական գործունէութիւնս:

Հ- Կը խնդրէի պատմել այդ նախագծի մտայղացման եւ իրագործման մասին:

Պ- «Արուեստի սերմեր» նախագիծի մտայղացումը երկամեայ պատմութիւն ունի: 14 տարեկան հասակիս Յորդանանի Մաան քաղաքի մէջ կազմակերպեցի ապակիի վրայ նկարչութեան դասընթաց, որուն մասնակցեցան շարք մը սահմանափակ կարողութիւններու տէր փոքրիկներ: Դասընթացի շնորհիւ այսօր փոքրիկները երկրին մէջ տարբեր ցուցահանդէս-վաճառքներու կը մասնակցին եւ ինքնուրոյն եկամուտ կ’ապահովեն:

Այս դասընթացը հիմք հանդիսացաւ ներկայիս «Արուեստի սերմեր» երկհարթակ նախագիծին: Նախ իմ նկարչութիւններուս ցուցահանդէս-վաճառքը կազմակերպեցի Ապրիլ ամսուն ալ-Հուսէյն մշակութային կեդրոնին մէջ Յորդանանի Մշակոյթի նախարարութեան աջակցութեամբ, ապա ցուցահանդէսի հասոյթի միջոցով նկարչութեան դասընթացներ պիտի կազմակերպեմ երկրի այդպիսի քաղաքներու մէջ, ուր «գոյներու» մասին որեւէ պատկերացում չունին: Ըսեմ որ ասիկա արդէն իրագործման փուլին մէջ է:

Հ- Ձեր ներկայացուցած արուեստին մէջ ակնյայտ է հայկական շունչը…… Արդեօք այցելած էք մայր հայրենիք: Կը ցանկաք Հայաստանի մէջ ցուցահանդէս կազմակերպել:

Պ- Ցաւօք դեռ չեմ այցելած Հայաստան, սակայն ցանկութիւնս չափազանց մեծ է այնտեղ ցուցահանդէս կազմակերպելու առաւել եւս ուսանելու: Կ’ուզեմ Արուեստի մէջ խորանալ Հայաստանի մէջ։

Հ- Նարօտ, մեր հայ արուեստասէր պարմանուհիներուն ինչ խորհուրդ կու տաք:

Պ- Շարունակ նկարել եւ երբեք չվհատիլ: Խոչընդոտներ պիտի ըլլան, սակայն կամքի ուժով կարելի է իւրաքանչիւր դժուարութիւն յաղթահարել:

Հայը ուր ալ ըլլայ կը շարունակէ վառ գոյներով լուսաւորել իր միջավայրը:

ՀԱՅԿԱՇԽԱՐՀ

Այգ Պետրոսեան (Յորդանան)