Պելկրանօ եւ Արժանթինի արեւմտեան ազգային համալսարանները չեղեալ յայտարարած են «1915 թուական. օսմանեան կայսրութեան ամենաերկար տարին» թեմայով համաժողովը, որ կը մերժէ Հայոց Ցեղասպանութիւնը: Համաժողովը պէտք տեղի ունենար Անգարայի համալսարանի հետ համատեղ, կը հաղորդէ «Նիուզ»-ը՝ վկայակոչելով Agencia Prensa Armenia-ն:

Համաժողովի յայտարարութենէն ետք հայ համայնքի բոլոր երիտասարդական կազմակերպութիւնները յայտարարած են, որ «նման ձեռնարկնրը անընդունելի են ակադեմիական միջավայրի մէջ, յատկապէս Արժանթինի մէջ, որ մարդու իրաւունքներու ոլորտի մէջ առաջատար երկիր է եւ առաջին երկիրներէն մէկն է, որ ճանչցած է Հայոց Ցեղասպանութիւնը»:

Արժանթինի Հայ դատի յանձնախումբի տնօրէն Նիքոլա Սապունկուեան նամակ յղած է համաժողովի կազմակերպիչներուն` նշելով, որ համաժողովի անուանման մէջ նշուած է Հայոց Ցեղասպանութեան սկզբի տարեթիւը, սակայն մարդկութեան դէմ կատարուած այս յանցագործութեան մասին չի նշուիր: Համաժողովը կը նախատեսուէր Անգարայի համալսարանի հետ համատեղ, որ կը համարուի թրքական կրթական համակարգի մէկ մասը եւ կը հանդիսանայ Հայոց Ցեղասպանութեան ժխտման քաղաքականութեան մէկ մասը:

Յիշեցնելով, որ համաժողովները տեղի ունեցած են Չիլիի, Քոլումպիայի եւ Փարակուայի, Էքուատորի եւ Տոմինիքեան հանրապետութեան համարլսարաններու մէջ, ան ընդգծած է, որ իրականացուած բոլոր համաժողովները ժխտած են Հայոց Ցեղասպանութիւնը: