Միսլատայի հայկական դպրոցին մէջ «Արարատ» հայկական միութիւնն աննախադէպ հանդիպում մը  կազմակերպած էր: Կրթօճախի հիւրն էր սպանական «Pasapalabra» («Անցիր բառը») հեռուստախաղի յաղթող Լիլիթ Մանուկեան: Տաղանդաւոր հայուհին վերոնշեալ հաղորդման մօտ 100 խաղի եւ վերջնական պայքարի յաղթող  ճանչցուած է, աչքի ինկած հրաշալի խաղով եւ սպաներէնի ու սպանագիտութեան աննկարագրելի գիտելիքներով: Լիլիթը նաեւ այս խաղի առաջին եւ ցայսօր միակ օտարազգի մրցակիցն ու յաղթողն է, որուն մայրենին սպաներէնը չէ:
ինչպէս «Հայերն այսօր»-ին կը յայտնեն կազմակերպիչները, Լիլիթ Մանուկեան նախապէս իր փորձը ներկայացուց ներկաներուն, որոնց մէջ էին նաեւ աշակերտներու ծնողները եւ այլ հայազգի հիւրեր: Տաղանդաշատ հայուհին շարք մը խորհուրդներ տուաւ մատաղ սերունդին` առաջին հերթին յորդորելով ըլլալ աշխատասէր ու նպատակասլաց` երազանքներու իրականացման ճանապարհին: Լիլիթ Մանուկեան իր հիացմունքը յայտնեց հայ փոքրիկներուն ու անոնց ծնողներուն, որոնք չեն զլանար եւ կը յաճախեն հայկական դպրոց` մայրենին ուսանելու համար:

Հիւրին խօսքին հետեւեցան բազմաթիւ հարցեր, որոնց Մանուկեան մեծ հաճոյքով պատասխանեց:

Հայկական դպրոցի սաները հիւրին համար նաեւ հայրենասիրութեամբ ոգեշնչուած ասմունքներ  պատրաստած էին, որմով ալ եզրափակուեցաւ այս սպասուած հանդիպումը: