Հայաստանի ֆութպոլի ազգային հաւաքականի աւագ Հենրիխ Մխիթարեան պաշտօնապէս տեղափոխուեցաւ Լոնտոնի «Արսենալ»: Այս մասին հաղորդած է «զինագործներ»ու պաշտօնական կայքը: Մխիթարեան պաշտօնապէս տեղափոխուեցաւ «Արսենալ», իսկ չիլիացի յարձակող Ալեքսիս Սանչեսը` «Մանչեսթըր Եունայթըտ»:

Իսկ թէ ինչ թիւով հանդէս պիտի գայ Մխիթարեան դեռ յայտնի չէ:

Հենրիխ Մխիթարեան «Մանչեսթըր Եունայթըտ» տեղափոխուած էր 2016 թուականին Տորթմունտի «Պորուսիա»-էն: Հայ կիսապաշտպանը «կարմիր սատանաներ»ու կազմին մէջ 2016/17 մրցաշրջանին դարձաւ Եւրոպայի լիկայի յաղթող` հեղինակելով եզրափակիչ երկու կոլերէն մէկը:

Հենրիխ Մխիթարեան հրաժեշտի խօսքով դիմած է «Մանչեսթըր»-ի իր համակիրներուն:

«Կը ցանկայի իմ անկեղծ շնորհակալութիւնը յայտնել «Մանչեսթըր Եունայթըտ»-ի խաղցողներուն, աշխատակազմին եւ, յատկապէս, համակիրներուն, իրենց սիրոյ եւ աջակցութեան համար: Ինծի համար մեծ պատիւ էր ձեր մեծագոյն ակումբին հետ շահիլ Եւրոպայի լիկան: Ես միշտ մեծ գնահատանքով պիտի յիշեմ այդ յիշողութիւնները: Ինչպէս նաեւ պիտի յիշեմ «կարիճ» հարուածով իմ կոլը, եւ ամէն անգամ խաղադաշտ դուրս գալուն «Whoa Մխիթարեան» երգը: Ես վայելած եմ ամէն րոպէն, որ անցուցած եւ կիսած ենք միասին: Իմ ասպարէզի այս շրջանին ես պէտք է բաւականութիւն ստանամ ես ինծմէ եւ խաղամ: Ի խորոց սրտի շնորհակալութիւն եւ յաջողութիւն կը մաղթեմ բոլորիդ: Կեանքը կը շարունակուի»,- Facebook-ի իր էջին մէջ գրած է Մխիթարեան:

«Մանչեսթըր Եունայթըտ»-ը Թուիթըրի իր էջին մէջ յաջողութիւն մաղթած է Մխիթարեանին` մասնաւորապէս գրելով. «Մենք յաջողութիւն կը մաղթենք Հենրիխ Մխիթարեանին տեղափոխութեան առիթով եւ շնորհակալութիւն յիշողութիւններու համար»: