Նախագահ Սերժ Սարգսեան Յունուար 22-24-ին աշխատանքային այց մը պիտի կատարէ Ֆրանսա՝ Փարիզ եւ Սթրազպուրկ:
Հանրապետութեան նախագահը Յունուար 22-ին և 23-ին հանդիպումներ պիտի ունենայ Ֆրանսայի նախագահ Էմանիւէլ Մաքրոնի, Ծերակոյտի նախագահ Ժերար Լառշէի, Ազգային ժողովի նախագահ Ֆրանսուա տը Ռիւժիի, ինչպէս նաեւ Ֆրանսա-Հայաստան բարեկամութեան երեսփոխանական խումբի անդամներուն հետ: Նշենք, որ այս մէկը Մաքրոն-Սարգսեան առաջին հանդիպումը պիտի ըլլայ: Հայաստանի եւ Ֆրանսայի նախագահները իրենց հանդիպման արդիւնքները պիտի ամփոփեն միացեալ մամլոյ ասուլիսի մը ընթացքին:
Նախագահ Սարգսեան նաեւ Փարիզի քաղաքապետարանին մէջ հանդիպում պիտի ունենայ քաղաքապետուհի Անն Հիտալկոյի եւ Ֆրանսայի հայ համայնքի ներկայացուցիչներուն հետ:
Յունուար 24-ին Սթրազպուրկի մէջ Հայաստանի նախագահը պիտի մասնակցի Եւրոպայի խորհուրդի խորհրդարանական վեհաժողովի (ԵԽԽՎ) ձմեռնային նստաշրջանին, ուր ելոյթ պիտի ունենայ եւ պիտի պատասխանէ երեսփոխաններու հարցումներուն: Սերժ Սարգսեան հանդիպումներ պիտի ունենայ նաեւ Եւրոպայի խորհուրդի ընդհ. քարտուղար Թորպեորն Եակլանտի, Մարդկային իրաւանց եւրոպական ատեանի (ՄԻԵԱ) նախագահ Կիտօ Ռայմոնտիի, «Ժողովրդավարութիւն՝ իրաւունքի միջոցով» եւրոպական յանձնաժողովի (Վենետիկի յանձնաժողով) նախագահ Ճաննի Պուքիքիոյի և ԵԽԽՎ-ի նորընտիր նախագահին հետ: