2016-ի հոկտեմբեր 1-ին Ալմաթիի «Ամուրէ» համերգաժամանցային հա­մալիրի յարմարաւէտ շէնքին մէջ Ղազախստանի հայերու միութեան «Մասիս» կազմա­կեր­պու­թեան ղեկավար Էռնեստ Վարդերեսեանի ջանքերով իր գործունէութիւնը սկսաւ հայ­կա­կան կիրակնօրեայ դպրոցը: Կը թուի` մէկ տարին բաւարար չէ սեփական ձեռագիր ունե­նալու եւ «պատմութիւն» կերտելու համար, բայց եկուր ու տես, որ այդ կարճ ժամանա­կահատուածին  Ալմաթիի դպրոցը ոչ միայն կրցած է իր շուրջ համախմբել հայ երեխաները, այլեւ դար­ձած է ազգային մշակոյթի զարգացման ու տարածման իւրատեսակ կեդրոն, ուր կը կազ­մա­կերպուին մշակութային ձեռնարկներ, մեծ շուքով եւ հանդիսութեամբ կը  նշուին նաեւ Ղազախստանի եւ ՀՀ պետական տօները:

Ինչպէս կը հաղորդէ «Հայերն այսօր»-ը, այս տարի Լուսինէ Շահուերդեանի նա­խա­ձեռ­նութեամբ, որ, ի դէպ, կառոյցի ղեկավարն Է. Վարդերեսեանի բնորոշմամբ, հայրենասէր եւ իր գործի իսկական նուիրեալ մարդ է, կազմակերպուեցաւ նաեւ ամառնային դպրոց: Այժմ ալ Լուսինէն «Մասիս»-ի ղեկավարութեան հետ համատեղ, կը նախագծէ Ալմաթիի մէջ հայերէնի ուսու­ցիչ­ներու դպրոց-կեդրոն հիմնելու ծրագիր եւ այլն:

Անոնք, որոնք կը ճանչնան Ղազախստանի հայերու միութեան «Մասիս» հասարակական կազմակեր­պու­թեան ղեկավար Էռնեստ Վար­դե­րեսեանը եւ գործադիր կոմիտէի անդամները` Ռոդիկ Մնացականեանը, Սահակ Սալում­եա­նը, Ռիմա Ցականեանը, Լուսինէ Շահուերդեանը, վստահ են, որ անոնց իւրաքանչիւր ծրա­գիր կամ նախագիծ շատ շուտով իրականութիւն պիտի դառնայ:

Մենք ալ կը շնորհաւորենք Ալմաթիի մեր հայրենակիցներուն կիրակնօրեայ դպրոցի մէկամեակին առթիւ եւ կը մաղթենք բեղմ­նաւոր գործունէութիւն` ի բարօրութիւն մեր ժողովուրդին: