Հայաստանի Հանրապետութեան պաշտպանութեան նախարարութիւնը Ատրպէյճանի ռազմաքաղաքական ղեկավարութեան կոչ կ՝ընէ զերծ մնալու նոր արկածախնդրութիւններէն, ինչպէս նաեւ կը նախազգուշացնէ, որ որեւէ սադրանքի պարագային հայկական կողմը պիտի դիմէ պատասխան կոշտ գործողութիւններու: Այս մասին նշուած է ՀՀ պաշտպանութեան նախարարութեան տարածած հաղորդագրութեան մէջ:

«Երէկ երեկոյեան ատրպէյճանական լրատուամիջոցները տեղեկութիւն տարածած էին, թէ հայկական զինուած ուժերու ստորաբաժանումները կրակած են ատրպէյճանական Գարալար գիւղի ուղղութեամբ, որուն հետեւանքով վիրաւորուած է 13-ամեայ երեխայ:

ՀՀ պաշտպանութեան նախարարութիւնը կտրականապէս կը հերքէ վերը նշուած տեղեկութիւնը եւ կը յայտարարէ, որ երէկ երեկոյեան եւ անցեալ գիշերուան ընթացքին հայկական զինուած ուժերը, հայ-ատրպէյճանական սահմանի ողջ երկայնքով, որեւէ զինատեսակէ չեն կրակած: ՀՀ պաշտպանութեան նախարարութիւնը մէկ անգամ եւս կը յիշեցնէ, որ Հայաստանի Հանրապետութեան զինուած ուժերը երբեք եւ որեւէ պարագայի նշանառութեան տակ չեն վերցներ խաղաղ բնակավայրերը:

Ատրպէյճանական քարոզչամեքենային կեղծիքը ի յայտ կու գայ նոյնիսկ իրենց տարածած լուսանկարներուն մէջ, ուր պարզ կ՝երեւի, որ երեխային վէրքերը ակնյայտօրէն հին են եւ որեւէ կապ չեն կրնար ունենալ իբր թէ Օգոստոս 7-ին ստացած բեկորային վնասուածքներու հետ:

Հայաստանի Հանրապետութեան պաշտպանութեան նախարարութիւնը Ատրպէյճանի ռազմաքաղաքական ղեկավարութեան կոչ կ՝ընէ զերծ մնալու նոր արկածախնդրութիւններէն, ինչպէս նաեւ կը նախազգուշացնէ, որ որեւէ սադրանքի պարագային հայկական կողմը պիտի դիմէ պատասխան կոշտ գործողութիւններու»: