Շուշիի Ռէալական ուսումնարանի բացօթեայ տարածքին, Սեպտեմբեր 1-ին, ժամը 20:30-ին, տեղի պիտի ունենայ Հարօ Ստեփանեանի «Սասունցի Դաւիթ» հերոսական օփերայի համաշխարհային անդրանիկ ներկայացումը՝ ՀՀ Նախագահի Տիկին Ռիթա Սարգսեանի բարձր հովանաւորութեամբ, ԼՂՀ մշակոյթի եւ երիտասարդութեան հարցերու նախարարութեան եւ ՀՀ մշակոյթի նախարարութեան աջակցութեամբ:

Ներկայացումը կը նուիրուի Արցախի անկախութեան օրուան, Շուշիի ազատագրման 25-ամեակին եւ Հարօ Ստեփանեանի ծննդեան 120-ամեակին:

Նախագիծին հեղինակը եւ գեղարուեստական ղեկավարը Սարինէ Աւթանդիլեանն է, խմբավարը` Սուրէն Շահիջանեանը (Ֆրանսա):

«Սասունցի Դաւիթ» օփերան Հարօ Ստեփանեանը գրած է 1936-ին: Լիպրեթոն գրած է Դերենիկ Դէմիրճեանը՝ ըստ «Սասունցի Դաւիթ» հայ ժողովրդական էպոսի: «Սասունցի Դաւիթ» հերոսական օփերան` իր ինքնատիպ վիպապատմողական երաժշտական լեզուով եւ ազգային ոգիով, հայկական օփերային արուեստի զարգացման նշանակալից փուլը կը նշանաւորէ: Արցախի մէջ «Սասունցի Դաւիթ» օփերայի անդրանիկ ներկայացումը մշակութային կարեւորագոյն իրադարձութիւն է:

Երաժշտահան Հարօ Ստեփանեանը ծնած է 1897-ին Ելիզավեթփոլ (այժմ` Գանձակ): Մասնակցած է առաջին համաշխարհային պատերազմին: 1919-ին, մէկ տարի, ուսանած է Թիֆլիսի երաժշտանոցին մէջ, Ա. Տէր-Ղեւենդեանի դասարանը, իսկ 1923-ին ընդունուած է Մոսկուայի Գնեսինների անուան երաժշտական ուսումնարան Միխայիլ Գնեսինի ստեղծագործական դասարան, այնուհետեւ ուսանած է Լելինկրատի երաժշտանոցի՝ Վ. Շչերպաքովի ստեղծագործական դասարանին մէջ: 1927-1929-ի ամրան Ստեփանեանը մասնակցած է Քրիստաֆոր Քուշնարեանի կազմակերպած ժողովրդական երաժշտութեան հաւաքման արշաւին: Հայաստանի տարբեր շրջաններու մէջ, յատկապէս Շիրակի, անոնք գրի առած են 350-էն աւելի հայկական եւ քրտական մեղեդիներ: 1930 թուականէն մշտական բնակութիւն հաստատած է Երեւան: Հեղինակած է հինգ օփերա, երեք սիմֆոնիա, բազմաթիւ երգեր, ռոմանսներ, կամերային-գործիքային ստեղծագործութիւններ: 1930-1934 ղեկավարած է Երեւանի Կոմիտասի անուան երաժշտանոցի ստեղծագործական դասարանը, 1938-1947 Հայաստանի երգահաններու միութիւնը: 1938-ին ընտրուած է Հայաստանի Գերագոյն խորհուրդի պատգամաւոր: 1960-ին արժանացած է Հայաստանի ժողովրդական արտիստի կոչման: