Յուլիս 28-30 Պուխարեստի Հայկական փողոցին մէջ (Strada Armeneasca) կայացաւ Սթրատա Արմէնիասկա աւանդական փառատօնի (Festivalul Strada Armeneasca) 4-րդ թողարկումը: Այն կազմակերպած էին Ռումանիոյ Հայոց միութիւնը եւ Հայ երիտասարդաց կազմակերպութիւնը (Armenian Youth Organization – AYO)` Հայաստանեայց Առաքելական եկեղեցւոյ Ռումանահայոց թեմի, Ռումանիոյ կառավարութեան միջէթնիկ յարաբերութիւններու վարչութեան, Պուխարեստի քաղաքապետարանի եւ բազմաթիւ այլ հովանաւորներու ու գործընկերներու աջակցութեամբ: Փառատօնը փոխնիփոխ կը վարէին ռումանահայ յայտնի քաղաքական գործիչներ, Ռումանիոյ խորհրդարանի պատգամաւորներ գրող Վարուժան Ոսկանեանը եւ Վարուժան Փամբուկչեանը:

Ինչպէս «Հայերն այսօր»-ին կը յայտնեն Ռումանիոյ մէջ ՀՀ դեսպանատունէն, երեք օր շարունակ` առտուն կանուխէն մինչեւ ուշ գիշեր, Պուխարեստի Հայկական թաղամասին մէջ` Քարթիերուլ Արմէնիսկի մէջ (Cartierul Armenesc) կը թեւածէր հայկական շունչն ու ոգին, կը ներկայացուէին հայկական մշակոյթն ու աւանդոյթները, կը հնչէին հայկական խրոխտ երգն ու հոգեթով պարը: Փառատօնին հրաւիրուած էին նաեւ աւանդական դրկից մասնակիցներ` յունական, հրէական եւ գնչուական վոկալ եւ գործիքային խումբեր:

Փառատօնին վարպետ կատարումներով հանդէս եկան ռումանահայ անուանի երգչուհի Քորինա Քիրիակը (Corina Chiriac), որ պատմեց իր հայկական արմատներուն եւ ցեղասպանութեան մասին, Միքօ եւ խումբ (Mico&Crew) անսամպլը,  Պասքա (Basska) ռոք-խումբը, Նիքու Ալիֆանտիս (Nicu Alifantis & Fragile Band) խումբը, հրէական Քլեզմէր (Klezmer Band) եւ Վայնպերկեր (AG Weiberger) խումբերը, գնչուական (Mahala Rai) եւ յունական Քիմաթա (Kymata) անսամպլները: Որոտընդոստ ծափողջուններով ընդունուեցան Կեռլայի հայաքաղաք եւ Պուխարեստի Վարդավառ պարախումբերու (ղեկավարներ Էրիկա Էստէգար եւ Պելլա Մարտիկեան) ելոյթները:

Փառատօնին առանձնայատուկ փայլ հաղորդեցին ՀՀ մշակոյթի վաստակաւոր գործիչ Գագիկ Գինոսեանի ղեկավարութեամբ Հայաստանէն յատկապէս հրաւիրուած «Կարին» ժողովրդական պարախումբի ելոյթները, որոնք ընդունուեցան ջերմագին խանդավառութեամբ:

Անկրկնելի կատարումներով հանդէս եկաւ էթնոճազի ռումանահայ հանրաճանաչ վարպետ Հարրի Դաւիդեան (Harri Tavitian) յայտնի թմբկահար Չերէյ Չապայի (Cserey Csaba) ուղեկցութեամբ:

Պուխարեստի երիտասարդական Ռամպա (Rampa) թատերախումբը հանդէս  եկաւ Վարուժան Ոսկանեանի «Շշուկներու մատեան» վէպի հիման վրայ Արմինէ Ոսկանեանի «Տղդմնացիրեան» (Staipelochian) ներկայացմամբ:

Պուխարեստի «Արարատ» հրատարակչութիւնը փողոցի ամբողջ երկայնքով փռած էր հազարաւոր գիրքեր` Հայկական փողոցը վերածելով գիրքերու փողոցի: Թողարկուած էր նաեւ փառատօնի եւ Ռումանիոյ մէջ հայերու ներկայութեան պատմութիւնը վերհանող յատուկ ազդաթերթ` հնատիպ լուսանկարներով:

Փառատօնն ընդգրկած էր Հայկական փողոցին յարակից Պուխարեստի հայկական համալիրի ամբողջ տարածքը` Հայկական եկեղեցին եւ Առաջնորդարանը, Դուդեան թանգարանը եւ գրադարանը, Հայկական մշակութային կեդրոնը, ուր ազատ մուտք ապահովուած էր փառատօնի մասնակիցներուն ու այցելուներուն համար: Այստեղ նաեւ կը գործէր յայտնի լուսանկարիչ Հրայր Խաչերեանի Հայաստանն ու հայաշխարհը պատկերող լուսանկարչական անզուգական աշխատանքներու ցուցահանդէսը:

Կիրակի օրը Առաջնորդանիստ Սբ Հրեշտակապետաց եկեղեցւոյ մէջ Ռումանիոյ Հայոց թեմի առաջնորդ Տաթեւ եպս. Յակոբեանի կողմէ մատուցուեցաւ Սբ. պատարագ, որուն յաջորդեց Վարդավառի ծէս:

Հայկական փողոցի երկայնքով շարուած կրպակներուն մէջ ներկայացուած էին հայկական ձեռագործ զարդեր, խեցեղէն, գորգեր եւ գործուածքներ, սրբապատկերներ եւ նկարազարդումներ: Բացօթեայ հայկական ճաշատանը հազարաւոր այցելուներ համտեսեցին հայկական խորտիկներ եւ աւազի վրայ պատրաստուած աւանդական սուրճ: Առաջնորդարանի բակի մանկական անկիւնին մէջ երեխաներուն համար կազմակերպուած էին ստեղծագործական խաղեր եւ աշխատանքներ:

Փառատօնին  մասնակցելու եկած էին Ռումանիոյ Հայոց միութեան մասնաճիւղերու ղեկավարներ եւ ներկայացուցիչներ Ռումանիոյ հայաշատ քաղաքներ Կեռլայէն, Քլուժ-Նափոկայէն, Ռոմանէն, Պակաուէն, Թըրգու-Օկնայէն, Պայա-Մարէէն, Եաշիէն, Պոթոշանէն եւ այլ վայրերէ:

Սթրատա Արմէնէասկա փառատօնին մասնակցեցան տասնեակ հազարաւոր այցելուներ, այն լայն արձագանք գտաւ ռումանական ԶԼՄ-ներուն մէջ, ներառեալ «Աճերփրես» գործակալութեան յատուկ թողարկումը: