Հայ Կաթողիկէ Պատրիարքութիւնը Հռոմի Կաթոլիկ Եկեղեցւոյ հետեւորդ հայազգի անհատներու (եկեղեցական եւ աշխարհական) հաւաքականութիւն է, որ միացած է Հռոմի Աթոռին եկեղեցական եւ դաւանական հաղորդութեամբ, կը ճանչնայ, կ’ընդունի Հռոմի Պապի գերագահութիւնը:

Հայ Կաթողիկէ Եկեղեցին իբրեւ կառոյց եւ Եկեղեցի` Տանն Կիլիկիոյ Հայ Կաթողիկէ Պատրիաքութիւն,  հաստատուած է 1740 թուականի նոյեմբեր 26-ին Հալէպի մէջ, երբ Աբրահամ Պետրոս Ա Արծիւեան (1679-1749թթ.) օծուած է Հայ Կաթողիկ համայնքի Պատրիարք: 1742 թուականին Հռոմի Պապ Բենեդիկտոս XIV-ը վաւերացուցած է Աբրահամ Ա Արծիւեանի պատրիարքական ընտրութիւնը:

Ներկայիս Հայ Կաթողիկէ Պատրիարքական Աթոռը կը գտնուի Լիբանան` Զմմառի վանքին մէջ, որ հիմնուած է 1749 թուականին:

Կը գործեն Հայ Կաթողիկէ հետեւեալ առաջնորդութիւնները`

 Լիբանանի պատրիարքական թեմ (առաջնորդանիստը` Զմմառի վանք, առաջնորդը` 1999 թուականէն Ներսէս Պետրոս ԺԹ Թարմունի Կաթողիկոս Պատրիարք), Բերիոյ թեմ (առաջնորդանիստը` Հալէպի Տիրամայր օգնութեանց եկեղեցի), Բարձր Ճեզիրէի թեմ (Ղամըշլի, Սուրիա), Դամասկոսի պատրիարքական էկզարխութիւն (Սուրիա), Պոլսոյ թեմ (Թուրքիա), Ալեքսանդրիոյ թեմ (Գահիրէ, Եգիպտոս), Սպահանի թեմ (Թեհրան, Իրան), Պաղտատի թեմ (Իրաք), Երուսաղէմի պատրիարքական փոխանորդութիւն (Իսրայէլ), Ֆրանսայի թեմ (առաջնորդարանը` Փարիզ), Յունաստանի վիճակ (առաջնորդարանը` Աթէնք), Հիւսիսային Ամերիկայի թեմ (առաջնորդարանը` Նիւ Եորք, ԱՄՆ), Հարաւային Ամերիկայի թեմ (առաջնորդարանը` Պուէնոս Այրէս, Արժանթին):

 Իտալիոյ մէջ կը գործէ Վենետիկի Մխիթարեան միաբանութիւնը (մայրավանքը` Սուրբ Ղազար կղզիիին մէջ):

 Հայ կաթոլիկ համայնքներ կան Լեհաստանի, Աւստրալիոյ, Հունգարիոյ մէջ:

1991 թուականին Հռոմի Պապի վճիռով կազմաւորուած է Հայաստանի, Վրաստանի եւ Արեւելեան Եւրոպայի թեմը (առաջնորդարանը` Գիւմրի): Թեմը կ’ընդգրկէ

նաեւ Ռուսաստանի եւ Ուքրանիոյ Հայ կաթոլիկ համայնքները: