Սայաթ Նովայի յիշատակը յաւերժացնող «Վարդատօն-2017»-ը տեղի պիտի ունենայ Մայիս 28-ին Թիֆլիսիի Մէջ։ Aliq.ge-ի հաղորդմամբ, «Վիրահայերու միութիւն»-ը՝ Թիֆլիսի քաղաքապետարանին, Հայաստանի եւ Վրաստանի մշակոյթի նախարարութիւններուն, Թիֆլիսիի Պետրոս Ադամեանի անուան պետական դրամատիկական թատրոնի եւ Վրաստանի մէջ ՀՀ դեսպանութեան աջակցութեամբ կը կազմակերպէ աշուղ Սայաթ Նովային նուիրուած աւանդական «Վարդատօն»-ը:

Համերգային ծրագրին պիտի մասնակցին Հայաստանի հանրային ռատիոյի «Սայաթ Նովա» աշուղական երգի վաստակաւոր անսամպլը, գեղարուեստական ղեկավար` Հայաստանի ժողովրդական արտիստ, փրոֆէսոր Թովմաս Պօղոսեան,  Թիֆլիսի «Ջեյրան», «Վանքէ, «Անի» եւ «Մուշ» պարային խումբերը, Թիֆլիսի Պետրոս Ադամեանի անուան պետական դրամատիկական թատրոնի թատերական խումբը:

Վարդատօնը առաջին անգամ տօնած են 1914-ին,  Թիֆլիսիի մէջ Յովհաննէս Թումանեանի, Գէորգ Բաշինջաղեանի եւ Իոսեբ Գրիշաշուիլիի նախաձեռնութեամբ: Աւանդաբար ամէն տարի Թիֆլիսի մէջ Մայիսի վերջին Կիրակին կը նշուի որպէս Սայաթ Նովայի յիշատակի օր` «Վարդատօն»: