ՀԲԸՄ -ՀԵԸ  Անդրանիկ Մշակութային Միութեան  կազմակերպութեամբ   Չորեքշաբթի, 19 Ապրիլ 2017, երեկոյեան  ժամը 6-ին, Զէյթունա Պէյ-ի «Եախթ Գլապ Կալերի»ի մէջ, Պէյրութ,  արուեստասէր  ընտրանիի մը  ներկայութեան, տեղի ունեցաւ  հայ  եւ  օտար  նկարիչներու աւելի քան  125  կտաւներու  ցուցահանդէս վաճառքին   պաշտօնական  բացումը:

Բացման   ժապաւէնը  հատեց ՀԲԸՄ-ի  Լիբանանի Շրջանակային Յանձնաժողովի   ատենապետ Ժեռար Թիւֆենկճեանը, կողքին` պաշտպանութեան նախարար Եաքուպ Սարաֆը, Լիբանանի մէջ  Հայաստանի  հանրապետութեան լիազօր եւ   դեսպան  Սամուէլ  Մկրտչեանը, երեսփոխան   Արթիւր  Նազարեանը, ՀԵԸ-ի Կեդրոնական Վարչութեան ատենապետ Վիգէն Չերչեանը:

Բացումին   յաջորդեց  հիւրասիրութիւն մը: Այդ  միջոցին  ներկաները  ծանօթացան նկարչական  տարբեր դպրոցներ  ներկայացնող Կիրակոսեանի, Ժանսեմի,  Հրայրի, Յակոբ Յակոբեանի, Յարութ Թորոսեանի, Գլոտ Վենարի, Անտրէ Լասքոյի  եւ այլ  հանրածանօթ արուեստագէտներու գործերուն: Լիբանանեան մամուլը եւ  հեռատեսիլի   կայաններ լայնօրէն արձագանգեցին ցուցահանդէսին:

Նշենք, թէ ցուցահանդէս-վաճառքը բաց է  Չորեքշաբթի, 19 Ապրիլէն մինչեւ Կիրակի, 23  Ապրիլ 2017, առաւօտեան  ժամը 11-էն մինչեւ երեկոյեան ժամը՝ 8.30: Ուրբաթ, 21 Ապրիլ  երեկոյեան  ժամը 8-ին տեղի պիտի ունենայ  յատուկ աճուրդ – վաճառք:

ՀԵԸ-Ի ՄԱՄԼՈՅ  ԵՒ ՏԵՂԵԿԱՏՈՒԱԿԱՆ  ԳՐԱՍԵՆԵԱԿ