Հայ համայնքը Սերպիոյ մէջ սիրուած  է եւ մեծ յարգանք կը վայելէ:

Ամենայն Հայոց Կաթողիկոսին հետ հանդիպման ըսած է Հայաստանի մէջ Սերպիոյ նորանշանակ արտակարգ եւ լիազօր դեսպան դեսպան Տուշան Սպասոեւիչին (նստավայրը` Աթէնք):

Մայր աթոռի տեղեկատուական համակարգի փոխանցմամբ, Վեհափառ Հայրապետը, շնորհաւորելով դեսպանը նշանակման առիթով, կարեւոր համարած է երկու երկիրներու միջեւ յարաբերութիւններու եւ գործակցութեան ընդլայնումը:

Նորին Սրբութիւնը անդրադարձած է երկու ժողովուրդներու պատմական առնչութիւններուն, ինչպէս նաեւ Հայաստանեայց Առաքելական եւ Սերպ Ուղղափառ Եկեղեցիներու եղբայրական կապերուն: Այս առիթով Ամենայն Հայոց Կաթողիկոսը դեսպանին միջոցով իր բարեմաղթանքներն ու ողջոյնները  փոխանցած է Սերպ Ուղղափառ Եկեղեցւոյ պետ Իրենէոս Պատրիարքին:

Զրոյցի ընթացքին խօսուած է նաեւ երկու Եկեղեցիներու առջեւ ծառացած արդի մարտահրաւէրներու եւ ատոնց յաղթահարման ուղղուած ջանքերուն մասին: