Փետրուար 26-ին Տիւմէնի Մեսրոպ Մաշտոցի անուան հայկական մշակոյթի կեդրոնին մէջ (Տիւմէնի մարզի «Հայաստան» հայկական մշակութա-լուսաւորչական հասարակական կազմակերութեան կից գործող, նախագահ` Հ. Փաշայեան) տեղի ունեցաւ գեղեցիկ ձեռնարկ` նուիրուած Մայրենիի օրուան:

Ինչպէս «Հայերն այսօր»-ին կը յայտնէ Ալվան Պօղոսեան, ձեռնարկին նպատակը երեխաներուն մայրենիի նկատմամբ սիրոյ, նուիրուածութեան զգացումի դաստիարակումն էր:

Օրուան «հերոսներն» էին Տիւմէնի Մեսրոպ Մաշտոցի անուան հայկական մշակոյթի կեդրոնի եւ Տիւմէնի ստեղծագործական զարգացման եւ հումանիտար կրթութեան «էթնոս» մանկական կեդրոնի հայկական խումբի սաները (ուսուցիչներ`  Ա. Պօղոսեան, Ռ. Դանիէլեան, Ս. Սիմոնեան):

Ձեռնարկը բովանդակային առումով կ’ընդգրկէր ոսկեդարէն այսօր երկարող շղթան: Կեդրոնի սաները  հանդիսատեսին ներկայացուցին  մայրենիի ծագման, անցած ուղիին, զարգացման մասին: Հնչեցին բանաստեղծութիւններ`  նուիրուած մայրենիին, ինչպէս նաեւ հայ եւ օտար մտածողներու ասոյթներ հայոց լեզուի մասին: Երեխաները արժեւորեցին լեզուի դերը` որպէս ազգապահպան գործօն, երդուեցան անաղարտ պահելու մայրենին, նպաստելու անոր զարգացման: «Հայկական տառերու գիւտը» ներկայացումով հանդէս եկան կեդրոնին մէջ գործող թատերական խումբի սաները (ղեկ.`Բագրատ Թադեւոսեան): Ձեռնարկը համեմուեցաւ  հայկական երգ ու պարով:
Աղունիկ Նանայեան (կեդրոնի կազմակերպչական մասի պատասխանատու անձ) իր խորին շնորհակալութիւնը յայտնեց ձեռնարկին ներկայ գտնուող հիւրերուն եւ աւելցուց, որ մեր լեզուն մեր ժողովուրդին պահպանած է դարերու ընթացքին ու օգնած  պահպանելու հայու ինքնութիւնը:

Ծնողներուն կողմէ շնորհակալական խօսքով  հանդէս եկաւ Ռ.  Սարգսեան.
«Կը շնորհաւորենք բոլոր ներկաները  եւ անկեղծօրէն  շնորհակալութիւն կը  յայտնենք այս գեղեցիկ ձեռնարկի կազմակերպիչներուն:  Ծնողներուն կողմէ  խորին շնորհակալութիւն անոնց,  որոնք իրենց ներդրումն  ունեցան  հայկական  այս յարմարաւէտ կրթօճախի ստեղծման հայրենանուէր գործին մէջ, յանձինս` Սերկօ Ստեփանեանի, Համլէտ Փաշայեանի:
Այժմ այստեղ մեր երեխաները ունին բոլոր հնարաւորութիւնները` գրել-կարդալ սորվելու,  մասնակցելու այսպիսի ձեռնարկներու,  արտասանելու, երգելու միմիայն հայերէնով»: