Հայաստանի Հանրապետութեան արտաքին գործոց նախարար Էդուարդ Նալպանտեան եւ Լիբանանի Հանրապետութեան արտաքին գործոց եւ գաղթականութեան նախարար Ժպրան Պասիլ ուղերձներ փոխանակած են Հայաստանի Հանրապետութեան եւ Լիբանանի Հանրապետութեան միջեւ դիւանագիտական յարաբերութիւններու հաստատման 25-ամեակին առիթով։ Այս մասին կը տեղեկացնեն ՀՀ արտաքին գործոց նախարարութեան մամուլի, տեղեկատւութեան եւ հասարակայնութեան հետ կապի վարչութենէն:

Էդուարդ Նալպանտեան իր ուղերձին մէջ նշած է, որ աշխարհի մէջ քիչ են այնպիսի երկիրները, որոնք կապուած են այնքան բազմաթիւ թելերով, որքան Հայաստանը եւ Լիբանանը: Մեր բարեկամութիւնը խարսխուած է պատմական խոր առնչութիւններու, մշակութային հինաւուրց կապերու եւ այն ջերմութեան վրայ, որ երկու ժողովուրդները աւանդաբար կը տածեն իրարու հանդէպ: Նախարար Նալպանտեան կ՝ընդգծէ, որ լիբանանահայ հոծ համայնքը այդ կապերու ամրապնդման եւ զարգացման կարեւորագոյն գրաւականներէն մէկն է:

Հայաստանի արտաքին գործոց նախարարը շեշտած է, որ այս ամուր հիմքերուն վրայ քառորդ դար առաջ ձեւաւորուեցան եւ զարգացան մեր երկիրներուն միջպետական յարաբերութիւնները, որոնք կ՝առանձնանան փոխվստահութեամբ ու իրարու հանդէպ խոր յարգանքով: Նախարար Նալպանտեան նաեւ նշած է, որ այսօր, հաւանաբար, չկայ այնպիսի ոլորտ, որ ներառուած չըլլայ հայ-լիբանանեան համագործակցութեան լայն դաշտին մէջ:

Մեծապէս կարեւոր համարելով մեր երկիրներուն միջեւ ձեւաւորուած աւանդական ջերմ յարաբերութիւնները` Էդուարդ Նալպանտեան վստահութիւն յայտնած է, որ համատեղ ուժերով պիտի կարենանք նպաստել բազմաշերտ փոխգործակցութեան առաւել սերտացման եւ խորացման:

Ժպրան Պասիլ իր ուղերձին մէջ նշած է, որ անցած քսանհինգ տարիներուն, չնայած համաշխարհային քաղաքականութիւնը ականատես եղած է բազմաթիւ փոփոխութիւններու, Լիբանանի եւ Հայաստանի բարեկամական համագործակցային յարաբերութիւնները առաւել ամրապնդուած են եւ սերտացած` մեր երկիրներու կենսական շահերուն առնչուող խնդիրներուն շուրջ փոխադարձ աջակցութեամբ եւ տարբեր ոլորտներու մէջ սերտ համագործակցութեան աշխուժացումով: Նախարար Պասիլ ընդգծած է, որ մեր երկու երկիրներուն յարաբերութիւնները կը պահպանեն համապարփակ զարգացման դրական ընթացքը, որմով լիբանանեան կողմը միանգամայն բաւարարուած է:

Լիբանանի արտաքին գործոծ նախարարը շեշտած է, որ 2017 թուականը ոչ միայն հնարաւորութիւն է` տօնելու այս կարեւոր հանգրուանը եւ մեր ձեռքբերումները, այլեւ լաւ առիթ է` ուրուագծելու եւ առաւել խթանելու մեր երկկողմ յարաբերութիւնները եւ համագործակցութիւնը:

Նախարար Պասիլ իր ուղերձին մէջ վերահաստատած է Հայաստանի հետ յարաբերութիւնները աւելի ու աւելի ամրապնդելու Լիբանանի կառավարութեան յանձնառութիւնը: